Dımash Qudaıbergenniń shoýy Qytaı telereıtınginde kósh bastady

ASTANA. KAZINFORM – Dımash Qudaıbergen atqarýshy prodıýser bolǵan «Voice Beyond Horizon» atty jańa mýzykalyq jobanyń debıýttik epızody Qytaı medıakeńistiginde sensatsııa jasady, dep habarlaıdy ártistiń resmı saıty. 

Bul jetistikti Hunan TV telearnasy jan-jaqty derektermen rastady. Premera Qytaıdyń CVB jelisinde, CSM ulttyq jelisinde jáne CSM71 qalalyq jelisinde aımaqtyq spýtnıktik telearnalar arasynda senimdi túrde kósh bastady. Sondaı-aq KuYun jáne Huanwang reıtıngterinde aımaqtyq spýtnıktik arnalar arasynda birinshi orynǵa ıe boldy.

Kórermen qyzyǵýshylyǵynyń aýqymy sandyq platformalardan alynǵan statıstıkamen rastalyp otyr.

Strımıngtik platformalarda tikeleı efırdegi translıatsııalardyń jıyntyq qamtýy 102 mln qaralymnan asty. Al áleýmettik jelilerde jobaǵa qatysty 143-ten astam taqyryp talqylanǵan.

- Alty elden (Italııa, Qazaqstan, Qytaı, Qyrǵyzstan, Malaızııa jáne Serbııa – red.) kelgen segiz ártistiń jáne jobanyń bastamashysy Dımash Qudaıbergenniń áserli óner kórsetýi álemge Uly Jibek jolynyń sımfonııasyn estýge múmkindik berdi, - dep habarlandy ártistiń saıtynda.

Qazaqstan atynan qatysqan Nurjas Sadyrbaev shoýdyń birinshi shyǵarylymynda jeńiske jetti. Qytaılyq ánshi Tsaı Chengıý ekinshi oryndy, al ıtalıandyq qatysýshy Djýlııa Falkone úshinshi oryndy ıelendi.

Mýzykalyq jobanyń tusaýkeseri 5 aqpanda ótti. Baǵdarlama ár beısenbi saıyn saǵat 22:00-de Hunan TV telearnasy jáne Mango TV platformasynan kórsetiledi.

Buǵan deıin Dımash Qudaıbergenniń «Voice Beyond Horizon» jobasy Túrkistanda kórsetilgenin jazǵan bolatynbyz.