Dımash Qudaıbergenniń Mehıkodaǵy kontserti anshlagpen ótti
ASTANA. KAZINFORM – 8 qazan kúni Dımash Qudaıbergenniń Latyn Amerıkasyndaǵy tuńǵysh jeke kontsertinde – Mehıko qalasynyń eń áıgili kontsert zaldarynyń biri «Auditorio Nacional» sahnasynda birde-bir bos oryn bolmady. Bul týraly dimashnews.com jazdy.
Kontsert bastalmaı jatyp-aq zaldyń dálizderinde meksıkalyq tyńdarmandar úlken top bolyp meksıkanyń ulttyq ánderin shyrqap, Dımashtyń esimin fýtbol jankúıerlerindeı urandatyp, erekshe áserli atmosferalyq kóńil kúı syılady.
Sahnaǵa Dımash «jalyndy» beınede shyǵyp, shoý «Golden» jáne «Smoke» ánderimen bastaldy. Tolastamas qoshemetten keıin ol kórermenderge qazaq, aǵylshyn jáne ıspan tilderinde jyly sálem joldady.
– Qaıyrly kesh, Meksıka! Sizderdiń aldaryńyzda óner kórsetý men úshin arman bolatyn. Sizderdiń sheksiz súıispenshilikterińiz ben energııalaryńyz úshin alǵysym sheksiz. Sizder meni óz úıimde júrgendeı sezindirdińizder. Búgingi keshte árbirińiz sıqyrǵa toly jumbaq sezimdi sezinetin bolasyzdar, - dedi ánshi.
Kórermender árbir án saıyn emotsııasyn jasyra almady. Dımash oryndaǵan ıtalıan tilindegi «Olimpico», qytaı tilindegi «Battle of Memory», orys tilindegi «Lıýbov ýstavshıh lebedeı», frantsýzsha «SOS D’un Terrien En Détresse», ıspansha «El Amore En Ti», aǵylshynsha «The Story of One Sky», sondaı-aq qazaq tilindegi «Mahabbat ber maǵan» jáne «Ave Maria» vokalızin kórermen zor yqylaspen qabyldady.
Kóp eldiń sahnasyn baǵyndyrǵan Dımash bul keshte erekshe shabytty kúıge endi. Ol kórermenge jıi qol bulǵap, «muchas gracias» dep alǵysyn bildirip otyrdy. Kontsert bastan-aıaq tym qýatty energııaǵa toly ótti.
Jurt Dımashtyń ár qımylyn qaıtalap, «Give Me Your Love», «Be With Me», «Taý Іshinde», «Weekend», «Living For The Game» ánderin oryndaǵan sátte birge bılep, «Umytylmas Kún», «Fire», «When I’ve Got You» sııaqty kúrdeli shyǵarmalardy ánshimen birge shyrqap turdy.
Kórermender ánniń qaıyrmasyna qosylyp turǵanda, Dımash sahnaǵa jaqyndaǵan tyńdarmandarmen qol alysyp, olarǵa óz qoltańbasyn berip úlgerdi. Pýblıkamen erekshe rýhanı baılanys ornaǵan sátte ol tosynnan ıspan tilindegi eń tanymal ánderdiń biri – «Besame Mucho» týyndysyn kórermenmen birge oryndady.
Ánshiniń inisi Ábilmansur elektrogıtarada áserli oryndaýymen tyńdarman yqylasyna bólendi. Al qazaqtyń ulttyq aspaptary – dombyra, sybyzǵy jáne qobyz úni «Adaı», «Dýrdaraz», «Stranger» jáne jańa týyndysy «Samǵaý» kompozıtsııalarynda erekshe úılese ketti.
Kontsert sońynda Dımash kórermenge júrekjardy alǵysyn bildirdi.
– Dostar! Sizder máńgi meniń júregimdesizder. Sizderdiń qoldaýlaryńyzsyz búginge deıingi jasalǵan jumystardyń biri bolmas edi. Mýzykant retinde men ıspan jáne meksıkalyq mýzykadan erekshe shabyt alatynym ras. Meksıkalyq kórermenmen alǵash Las-Vegasta Gennadıı Golovkın men Kanelo Alvares arasyndaǵy jekpe-jek aldynda Qazaqstan Respýblıkasynyń Ánuranyn oryndaǵan kezimde kezdeskenmin. Uzaq jyldar boıyna men Latyn Amerıkasy jerinde týǵan elimniń mádenıetin, qazaqtyń tili men án ónerin tanytýdy armandaǵan edim. Búgin sol armanym oryndalǵan kún. Sol úshin sizderge alyǵysym sheksiz! – dedi ánshi.
10 qazan kúni Dımash kórermendi Palacio de los Deportes sport saraıyndaǵy kontsertte kútedi.
Aıta keteıik, Dımash Nıý-Iorktegi kontserti týraly derekti fılm daıyndap jatyr.