Dımash Qudaıbergenniń halyqaralyq jobasy Almatyda kórsetildi
ALMATY. KAZINFORM – Almatylyqtar Dımash Qudaıbergenmen birge Voice Beyond Horizon halyqaralyq jobasynyń alǵashqy epızodyn tamashalady.
Jobanyń premerasy Qytaıdyń Hunan TV telearnasynda ótti. Al Almatyda alǵashqy bólimniń kórsetilimi Balýan Sholaq atyndaǵy sport saraıynda boldy. Onda ánshiniń jankúıerleri jınalyp, premerany úlken ekrannan kórdi. Dımash alǵash ret prodıýser bolǵan joba qytaılyq Hunan TV telearnasymen birlesip jasalǵan.
Voice Beyond Horizon kórsetilimi bastalǵanǵa deıin qonaqtarǵa shaǵyn kontserttik baǵdarlama usynyldy. Odan keıin sahnaǵa Dımash Qudaıbergenniń ózi shyǵyp, joba týraly aıtyp berdi. Ol otandastaryn halyqaralyq jobany qoldaýǵa shaqyryp, bul jeke bastama emes, eldi tanytý men jas talanttardyń áleýetin ashýǵa arnalǵan ortaq platforma ekenin atap ótti.
— Búgin men úshin erekshe kún. Sebebi dál osy sátte álemdik aýdıtorııa nazaryna Qazaqstanda túsirilgen Voice Beyond Horizon jobamyz usynylyp otyr. Bul elimizdiń damýy men tanymal bolýyna baǵyttalǵan ortaq jobany sizdermen birge tanystyrý — men úshin úlken mártebe, — dedi ol.
Dımashtyń aıtýynsha, joba baılanysqa shaqyrady, mádenıetti biriktiredi, elder arasyndaǵy dostyqty nyǵaıtady jáne shyǵarmashylyqqa shabyt beredi. Ol Voice Beyond Horizon arqyly búkil álemge Qazaqstannyń sulýlyǵy men mýzykanyń kúshin kórsetýdi maqsat etkenin aıtty.
Buǵan deıin Dımash halyqaralyq mýzykalyq baıqaý týraly oı I’m Singer jobasyna qatysqan kezde kelgenin aıtqan edi. Onyń sózinshe, aýqymdy vokalıster baıqaýyn bir kúni Qazaqstanda ótkizýdi armandaǵan.
Jobaǵa Serbııa, Italııa, Malaızııa, Qyrǵyzstan, Qytaı jáne Qazaqstannan kelgen jas ánshiler qatysqan. Shoý túsirilimderi 22 kún boıy Túrkistan, Aqmola, Mańǵystaý jáne Almaty oblystarynda, sondaı-aq Almaty men Astana qalalarynda ótti. Joba qatysýshylary eldi poıyzben aralap, Kaspıı teńiziniń jaǵalaýy, Bozjyra shatqaly, Kóbeıtuz jáne Qaıyńdy kólderi, Saty aýyly, Qapshaǵaı sý qoımasy jáne Şýchınsk-Býrabaı kýrorttyq aımaǵy sekildi negizgi týrıstik nysandarmen tanysty.
Óner ıesiniń ákesi Qanat Aıtbaev Dımashtyń eldiń týrıstik áleýetin tanytýǵa, jas oryndaýshylardy qoldaýǵa jáne memleketter arasyndaǵy mádenı baılanystardy nyǵaıtýǵa baǵyttalǵan halyqaralyq joba ıdeıasyn kópten beri oılap júrgenin aıtty.
— Dımashqa Voice Beyond Horizon jobasyn toǵyz jyl buryn ony halyqaralyq sahnaǵa shyǵarǵan Hunan TV telearnasymen birlesip júzege asyrý múmkindigi týdy. Baǵdarlamada elimizdiń eń kórikti aımaqtary kórsetiledi. Hunan TV aýdıtorııasy álemdegi eń irilerdiń biri ekenin eskersek, joba kórermenderdiń qyzyǵýshylyǵyn týdyrady dep úmittenemiz, — dedi Qanat Aıtbaev.
Eske salaıyq, Hunan TV telearnasynyń aýdıtorııasy 1,9 mıllıardtan asady. Joba Mango TV tsıfrlyq platformasynda da kórsetiledi.