Dımash Qudaıbergenniń 17 kontsertine barǵan polshalyq jankúıeri qazaq tilin úırenip júr
ASTANA. KAZINFORM – Álemge áıgili ánshi, otandasymyz Dımash Qudaıbergenniń kontsertine álemniń túkpir-túkpirinen kórermen keldi. Kontsert aldynda Polsha elinen kelgen bir top jankúıerdi kezdestirdik, solardyń biri Tereza Kakolmen tildesken edik.
Tereza Kakolmen birge 14 jankúıer Polshadan Dımash Qudaıbergenniń kontsertine arnaıy kelipti, olar elordada úsh kún bolmaq.
«Dımash Qudaıbergenniń ár kontserti – onyń jankúıerleri úshin erekshe mereke. Onyń kontsertinde bolý – Dımashtyń árbir tyńdarmany úshin arman. Onyń ústine jeke kontserti týǵan jeri Qazaqstanda bolyp jatyr. Búgingi án keshi erekshe ótedi dep taǵatsyzdana kútip otyrmyz. Biz Qazaqstanǵa kelgenimizge qýanyshtymyz», - dedi Tereza Kakol.
Polshalyq Tereza Kakol Dımashtyń 7 jyldan beri jankúıeri, osy ýaqyt ishinde áıgili ánshiniń ár elde bolǵan 17 kontsertinde bolǵan. Dımash Qudaıbergen týraly alǵash Qytaıda ótken «I Am a Singer» jobasynda tanyp, bilgen.
«Dımashtyń daýsy erekshe, joǵary notalardy erkin meńgeredi jáne vokaldyq dıapazony keń. Dımashty úzdiksiz tyńdaýǵa bolady. Polshada Dımashtyń jankúıerler bazasy bar, shamamen 15 myń adamnan turady», - deıdi ol.
Sheteldik meıman elimizdiń birneshe óńirinde bolǵan.
«Qazir Dımashtyń polshalyq jankúıerleri qazaq tilin úırenip júrmiz. Biz Dımashtyń ana tilin erkin túsingimiz keledi. Varshavada tórt jyldan beri «Dımash» ataýymen radıo jumys istep tur. Radıoda Dımashtyń ánderinen basqa da qazaq ánderi oınaıdy. Sonymen qatar radıo tyńdarmandarymen qazaq tilin birge úırenemiz. Radıodaǵy baǵdarlamany men júrgizemin, biraq ázirge qazaqsham máz emes, ýaqyt kerek», - deıdi ol.
Buǵan deıin Dımash Qudaıbergenniń jankúıerleri «Astana Arena» alańyna jınalyp jatqanyn jazǵan edik. Eske salaıyq, Dımash Qudaıbergen V dúnıejúzilik kóshpendiler oıyndarynyń ashylý saltanatynda óner kórsetti. Sondaı-aq, Ulttyq mýzeıde Dımash Qudaıbergenniń shyǵarmashylyǵyna arnalǵan kórme ashyldy.
«Dúnıe dıdaryndaǵy Dımash» kórmesine qazaq janynyń bolmysyn beıneleıtin, onyń qaıtalanbas únin qalyptastyrǵan, ómirindegi eleýli oqıǵalar týraly habar beretin qundylyqtar, tanymal tulǵalar men kóptegen jankúıerdiń syılyǵy qoıylǵan.
