Dımash Qudaıbergenniń jankúıerleri sany 2 mlrd adamǵa jetti
ASTANA. QazAqparat - Qazaqstandyq ánshi Dımash Qudaıbergenniń álem boıynsha jankúıerler sany 2 mlrd adamǵa jetti. Bul týraly búgin QR Mádenıet jáne sport mınıstri Arystanbek Muhamedıuly málimdedi, dep habarlaıdy «QazAqparat» HAA tilshisi.
«Dımash Qudaıbergen mınıstrliktiń qoldaýymen 2016 jyly «Slavıan bazary» halyqaralyq konkýrsyna qatysyp, bas júldeni jeńip aldy. Qazirgi tańda ol Qytaıdaǵy «Singer» kásibı oryndaýshylar baıqaýynda joǵary deńgeıde óner kórsetýde. Atap ótý kerek, Dımashtyń qatysýymen konkýrstyń kórsetilimi 2 mlrd kórermennen asýda. Demek, olar - Aıman Musaqojaeva basqaryp otyrǵan Ulttyq óner ýnıversıteti 3 kýrs stýdentiniń jankúıerleri bolyp tabylady. Bul, Memleket basshysy atap ótkendeı, ımıdjdik jobalar, ıaǵnı sport pen mádenıet arqyly Qazaqstannyń jetistigin álemge pash etýimiz kerek», - dedi Muhamedıuly Astanadaǵy vedomstvo alqasynyń otyrysynda.
Mádenıet mınıstri mádenı saıasattyń tujyrymyna sáıkes, 2014 jyldan bastap elimizdegi barlyq shyǵarmashylyq oryndardyń Mádenıet mınıstrliginiń qaramaǵynda ekendigin eske salyp ótti.
Olardyń barlyǵy kópdeńgeıli dýaldy bilim berý jáne daryndylardy mektep qabyrǵasynan bastap úlken sahnaǵa deıin úzdiksiz qoldaý tanytý qaǵıdasy boıynsha jumys jasaýda.
«Munyń aıqyn dáleli retinde Dımash Qudaıbergendi aıta alamyz. Ol balalar mýzykalyq stýdııasynda fortepıano jáne vokal synyby boıynsha bilim alyp júrip, «Aınalaıyn» halyqaralyq shyǵarmashylyq konkýrsynyń laýreaty atanǵan. A.Jubanov atyndaǵy mýzykalyq kolledjde bilim jolyn jalǵastyrdy. 2014 jyly Qazaq ulttyq óner ýnıversıtetiniń stýdenti atandy», - dep atap ótti mınıstr.
Eske sala keteıik, Dımash Qudaıbergen Qytaıda ótip jatqan «Singer» baıqaýynyń 6-kezeńinde álemge tanymal ánshi Lara Fabıannyń repertýarynan «Adagio» ánin oryndap, birinshi oryndy ıelendi.
