Dımash Qudaıbergenniń oryndaýyndaǵy «Daıdıdaý» áni álemdik radıo júıesine engizildi
ASTANA. QazAqparat - Aqtóbelik ánshi Dımash Qudaıbergenniń oryndaýyndaǵy halyq áni «Daıdıdaý» álemdik radıo júıesine engizildi. Bul Dımashtyń oryndaýyndaǵy ándi halyqaralyq radıo júıesindegi júzdegen eldiń turǵyndary tyńdaı alady degen sóz. Bul súıinshi habardy bizge Qazaqstan Respýblıkasynyń mádenıet qaıratkeri Qanat Aıtbaev jetkizdi, dep jazady «Aqtóbe» basylymy.
Q.Aıtbaevtyń aıtýynsha, halyqaralyq radıo ókilderi «Qazaq» radıosyna usynyspen shyǵyp, qazaq halqynyń ulttyq bolmysyn kórsetetin án suraǵan.
«Bizge hat kesh jetken bolýy kerek, álde bir jerde kidirip qaldy ma, áıteýir, bul jaqsy habardy bizge Lev Gýmılev atyndaǵy Eýrazııalyq ulttyq ýnıversıtetinde qyzmet etip jatqan jastar jetkizdi. Atalǵan ýnıversıtette jumys isteıtin Ushqyn Saıdrahman degen jigit halyqaralyq Evro radıosyna bir án usynýymyzdy surady. Oǵan Malaızııadaǵy Azııa-Tynyq muhıty habar taratý odaǵy shtab-kvartırasynyń qyzmetkeri Nurzada Kúmisbek qolqa salypty. Ushqyn qajetti qujattardy shet tilinde toltyryp, sonyń kómegimen Dımash Qudaıbergenniń oryndaýyndaǵy halyq áni «Daıdıdaýdy» usyndyq. Án barlyq talaptarǵa saı kelgen. Álibek Dinishevtiń oryndaýyndaǵy halyq áni «Aqbaqaıdy» usyný týraly da pikirler boldy. Degenmen oılasa kele «Daıdıdaýdy» jiberýdi jón kórdik», - deıdi «Qazaq» radıosynyń «Altyn qorynyń» mýzykalyq redaktory Gaýhar Qozybaeva.
Máseleniń máni bylaı: 13 aqpan - Halyqaralyq radıo kúni. Bul kúndi toılaý 2011 jyly ıÝNESKO-nyń sheshimi boıynsha qabyldanǵan jáne 2012 jyly alǵash ret atap ótilgen. Osy merekege baılanysty Eýropa habar taratý odaǵy men Azııa Tynyq muhıty habar taratý odaǵy bıyl halyqaralyq Evro radıosynyń arnasynda «80 mınýtta barlyq álem» atty is-shara uıymdastyrmaq. Bul shara barysynda radıo jelisinen osy habar taratý jelilerine múshe elderdiń barlyǵynyń sol eldiń mádenıeti men bolmysynan habar beretin ulttyq ánderi shyrqalatyn bolady. Sol ánder qataryna bıyl tuńǵysh ret qazaq áni engizildi: Dımashtyń oryndaýyndaǵy «Daıdıdaý» áni!
Qanat Aıtbaevtyń aıtýynsha, Dımashtyń oryndaýyndaǵy bul án belgili aranjırovşık Baqytbek Zeınelovtiń óńdeýinde jiberildi. Vıkıpedııa erkin-entsıklopedııaǵa sensek, Eýropa habar taratý odaǵy músheliginde Eýropa, Soltústik Afrıka jáne Taıaý Shyǵystaǵy 56 eldiń 72 kompanııasy, al Azııa-Tynyq muhıty habar taratý odaǵynda Azııa-Tynyq muhıty aýmaǵynyń 57 elindegi 72 kompanııa bar. Eki odaqtyń áleýetti aýdıtorııasy - keminde 4 mıllıard adam. Bul - Dımashtyń oryndaýyndaǵy qazaqtyń halyq ánin jarty álem tyńdaıdy degen sóz.
Aıtpaqshy, Qanat Aıtbaev taǵy bir jaqsy jańalyqpen bólisti. Kóktemde Dımash Túrki mádenıetin jáne ónerin damytý halyqaralyq uıymynyń muryndyq bolýymen AQSh-tyń Vashıngton, Nıý-Iork qalalarynda ótkiziletin sharalarǵa resmı shaqyrtý alǵan.
