Dımash Qudaıbergenniń kontserti: Almaty polıtsııasy kúsheıtilgen rejımde jumys isteıdi
Almaty polıtsııasy kontsert kezinde qoǵamdyq tártip pen jol qaýipsizdigin qamtamasyz etýge polıtsııa departamentiniń qyzmetteri men bólimsheleriniń 2,5 myńnan astam tártip saqshysy jumyldyrylatynyn málim etti.
«
Bul tek Qazaqstan úshin ǵana emes, halyqaralyq arenadaǵy aıtýly oqıǵa, sondyqtan ony dúrbeleńsiz, beıbereketsiz jáne eshqandaı quqyq buzýshylyqtarsyz óz deńgeıinde ótkizý óte mańyzdy. Polıtsııa qyzmetkerleri kontsert ótetin oryn men oǵan jaqyn aýmaqta qoǵamdyq tártipti qamtamasyz etedi
», - dedi Almaty qalalyq PD bastyǵy Arystanǵanı Zapparov.
Sonymen qatar, ol Abaı dańǵyly men Sátbaev kóshesiniń boıyna kólikterdi qoıýǵa tyıym salynǵanyn eskertti.
«Osyǵan baılanysty qonaqtardy kólikterin aldyn ala turaqqa qoıýǵa, qosalqy kóshelerdi paıdalanýǵa jáne keptelisterdi boldyrmaý úshin qozǵalys baǵytyn aldyn ala retteýge shaqyramyz. Kontsert kezinde ózin-ózi ustaý mádenıetine, alkogoldi ishimdikterdi paıdalanbaýǵa erekshe nazar aýdaramyz. Aǵa býyn jankúıerler men balalary bar áıelderge qurmet kórsetýge shaqyramyn», - dedi Arystanǵanı Zapparov.
Eske salaıyq, búgin Dımash Qudaıbergenniń Qazaqstandaǵy eń úlken jáne aty ańyzǵa aınalǵan sport ǵımarattarynyń biri - Ortalyq stadıonda «Stranger» atty jeke kontserti ótedi.