Dımash Qudaıbergenniń fanaty Rebekka ánshi oqyǵan kolledjde qazaqsha án saldy

AQTÓBE. QazAqparat -Dımash Qudaıbergenniń Aqtóbege kelgen fanaty Rebekka mýzykalyq kolledj sahnasynda «Mahabat ber maǵan» ánin oryndady. Ánshiniń ustazy Marat Áıtimov fanattyń tabıǵı talantyna tańqaldy, dep habarlaıdy QazAqparat tilshisi.

Ánshi Dımash Qudaıbergenniń «Arnaý» kontsertine kelgen bir top fanat Nur - Sultan, Almaty, Aqtóbe týrmarshrýtyn tańdaǵan. Olar bul úsh qalany aralaýǵa 4 myń AQSh dollaryn jumsady. Aqtóbege kelgen fanattar arasynda AQSh, Gavaı araly, Mazaızııa, Ulybrıtanııa men Frantsııa sekildi Eýropanyń birneshe qalasynyń turǵyny bar. Olar ádettegideı meshit, shirkeý, mýzeıge baryp, ánshi oqyǵan mektepte, mýzykalyq kolledjde boldy. Fanattar úshin ánshiniń ustazy Marat Áıtimovpen suhbat qyzyqty ótti. Ári sahnada án aıtýǵa múmkindik berilip, vokaldyq qabiletteri týraly bildi. Bárinen Gavaı aralynan kelgen Rebekkanyń daýysy kópti tańqaldyrdy. Ol «Mahabbat ber maǵan» ánin mýzykalyq súıemeldeýsiz oryndap shyqty.

«Rebekkada tabıǵı talant bar. Tynys alýy jaqsy, ıaǵnı, adam sportpen shuǵyldanady. Sportpen shuǵyldanatyn adam joǵary notalardy almasa da qınalmaı jaqsy án aıta alady. Mýzykany estı alady, qubyltady. Án taza shyqty. Sahnada sál qobaljyǵany baıqalady», - dedi ánshiniń ustazy Marat Áıtimov. Al fanat Rebekka taǵy Aqtóbege kelse Marat Áıtimovten sabaq alatyn boldy.

Buǵan deıin habarlaǵanymyzdaı, 25-maýsymda bir top fanat Aqtóbege kelip, qalanyń kórikti jerlerin aralaǵan bolatyn.

Fanattar úshin Dımash Qudaıbergenniń balalyq shaǵy, stýdenttik kezi qyzyqty. Olar Marat Áıtimovten este qalar oqýǵalar týraly aıtyp berýin surady.

«Dımash mýzykalyq kolledjge kelgende 15 jasta boldy. Daýysy óńdelmegen, qarapaıym edi. Qazirgi daýysy oqýmen, eńbekpen keldi. Ol tórt jyl boıy tynbaı daýysymen jumys istedi, jattyǵýlar jasady. Bastysy - talant. Án aıtatyn, daýysy bar adamdar kóp. Al Dımashta tabıǵı talant ta, aqyl da bar. Bári toǵysqanda alapat kúshke aınaldy. Faltsetti mýzykalyq kolledjde kóp qoldanbaımyz. Dımash úshinshi kýrstan bastap áýestendi. Alǵashqy kezde tyıym saldym. Kóbine men kolledjde bolmaǵan kezde bar daýysymen, faltsetpen án aıtady. Daýysy barlyq jerge estiledi. Meniń kirgenimdi bilgen kezde kózime túspeý úshin qashyp júredi. Ózine «judyryq» tıetinin biledi», - dedi Marat Áıtimov.