Dımash Qudaıbergenniń alǵashqy ustazy óz tańdaýyn jasady

AQTÓBE. QazAqparat – Aqtóbedegi №526 saılaý ýchaskesinde Dımash Qudaıbergenniń ustazy Klara Qajyǵalıeva óz tańdaýyn jasady, dep habarlaıdy QazAqparat tilshisi.

Aqtóbe oblysy boıynsha 517 saılaý ýchaskesi bar. Onyń 15-i mamandandyrylǵan uıymdarda ornalasqan, olar: medıtsına mekemeleri, áskerı bólimder, tergeý ızolıatorlary. Áskerı bólimde jáne vahtalyq kentterdiń janynda ornalasqan úsh ýchaskede saılaý tańǵy saǵat 6:00-de bastaldy. Qalǵan saılaý ýchaskeleri óz jumysyn tańǵy 7:00-den bastap, saǵat 20.00-de aıaqtaıdy.

Dımash Qudaıbergenniń alǵashqy ustazy Klara Qajyǵalıeva búgin óz tańdaýyn jasady.

«Búgin eń mańyzdy kún. Qazaqstannyń árbir azamaty Prezıdent saılaýyna qatysady dep oılaımyn. Elimiz keleshegi, urpaǵymyzdyń bolashaǵy árqaısymyzdyń tańdaýymyzǵa tikeleı baılanysty. Ózim elimizdiń bolashaq urpaǵyn tárbıeleýde eńbek etip júrmin. Sondyqtan da Qazaqstan Respýblıkasynyń kemeldenýi, baqytynyń baıandy bolýy - bizdiń qolymyzda», - dedi Klara Qajyǵalıeva.

Aıtýynsha, ol buǵan deıin ótken barlyq saılaýǵa qatysyp, tańdaýyn jasaǵan. Búgin de tańerteń erte turyp, mektepte ornalasqan ýchaskede daýys berdi.