Dımash Qudaıbergenniń ákesi oqyǵan mektep adam shoshyrlyq kúıde
AQTÓBE. QazAqparat - Aqtóbe oblysy, Embi qalasyndaǵy №2 orta mektep 40 jyl boıy jóndelmegen. Tereze áınekteri qurandy, edeni shuryq tesik, májilis zaly men ashanasy bar mektepte Dımash Qudaıbergenniń ákesi Qanat Aıtbaev ta bilim alǵan, dep habarlaıdy QazAqparat tilshisi.
Aqtóbe oblysy, Muǵaljar aýdanyna qarasty Embi qalasynda 5 mektep bar. №7 mektep-ınternatqa bir ǵasyrlyq ýaqyt bolyp, ótken jyly kúrdeli jóndeýden ótti. Biraq balalar úshin bul mektep-ınternatta sport zal qarastyrylmaǵan. Al №2 orta mektep 40 jyl boıy jóndelmeı, adam shoshyrlyq kúıge tústi. Esik-terezesi syqyrlap, edeni shuryq tesik bolǵan mektepte 499 oqýshy bilim alyp júr. Ustazdar keler jyly kúrdeli jóndeý júrgiziledi dep úmittenip otyr.
«Mektep 1977 jyly salyndy. Oqýshylar eki aýysymda bilim alady. Barlyǵy 67 muǵalim bar. Jyl saıyn qarapaıym jóndeý jumystary júrgiziledi. Al keler jyly kúrdeli jóndeý júrgiziledi degen jospar bar. Shatyryn aýystyrý, esik, terezesin jańalaý, edenin qalpyna keltirý qajet. 2017-2018 jyldary synyptarǵa parta, taqta ákelindi. Mekteptegi ınformatıka kabınetinde 19, al mýltımedııalyq kabınette 13 kompıýter bar», - dedi Embi qalalyq №2 orta mektebi dırektorynyń oqý isi jónindegi orynbasary Serik Álıev.
Kóktem pen kúzde jańbyr jaýyp, qar erigende mekteptiń tóbesinen sý aǵady. Mektep ujymy jyl saıyn óz kúshterimen jóndep, jamap qoıǵanymen barlyq tetikti qalpyna keltirý múmkin emes.
«Sport zal, májilis zaly men ashananyń tóbesinen sý aǵady. Májilis zaly men ashanasy bir jerde ornalasqan. Mektep salynǵan jyldan bastap kúrdeli jóndeý júrgizilmegeni shyndyq. Qazirgi kezde jobalyq-smetalyq qujat daıyndaldy»,- dedi mektep dırektorynyń orynbasary Baqyt Jaryqova. 
Tóbeden sý aqsa da bul mektepte dene shynyqtyrý páni keıinge qaldyrylǵan emes. Mektep ákimshiligi adam tózgisiz jaǵdaı bolǵan emes dep sendirip otyr.
«Bul mektepte Dımash Qudaıbergenniń ákesi Qanat Aıtbaev oqydy. Al ájesi Mıýa apa geografııa páninen sabaq berdi. Dırektorymyz Qanat Aıtbaevpen habarlasyp, «Túlek» jobasy aıasynda kómek berýin surady. Biraq nátıjesi qalaı bolǵanyn aıta almaımyn. Ánshi Qanat Aıtbaev ózi oqyǵan mektebine kelgen emes», - dedi Baqyt Jaryqova.
Aıta keteıik, bul mekteptiń jaǵdaıymen Embi qalasynyń ákimi Álimjan Qorǵanbaı habardar. Keler jyly eski mektepke kúrdeli jóndeý júrgiziledi dep málimet berdi.
«№2 orta mektepti jóndeý jumystaryna 250 mıllıon teńge qarjy qajet. Esigin, terezesin, edenin aýystyrý kerek. Kúrdeli jóndeý júrgiziledi. Bıyl aýdan ákimi kelip, mekteptiń jaǵdaıyn kórip ketti»,- dedi qala ákimi Álimjan Qorǵanbaı.
