Dımash Qudaıbergenge «Orman saqshysy» sertıfıkaty berildi

ASTANA. QazAqparat – Dımash Qudaıbergenniń Latyn Amerıkasynda turatyn jankúıerleri Argentınada ormandardy qalpyna keltirý boıynsha jobany aıaqtady. Patagonııa óńirinde 1 myń aǵash otyrǵyzý aktsııasyna álemniń túkpir-túkpirinen fanattar atsalysty, dep habarlaıdy QazAqparat dimashnews.com saıtyna silteme jasap.

Bıylǵy mamyr aıynda Dimash Latin Dears fan-klýby Argentınanyń Patagonııa óńirindegi ormandardy qalpyna keltirý úshin qarajat jınaýdy uıymdastyrǵan bolatyn. Bastapqyda qazaqstandyq ártistiń jankúıerleri 382 aǵash otyrǵyzdy. Alaıda keıin ekinshi naýqandy bastap, maqsatty 1 myń aǵashqa deıin ulǵaıtty.

Osylaısha, Patagonııa aımaǵynda 2000 jylǵa deıin ómir súre alatyn óte ádemi ári úlken qylqan japyraqty Chılı araýkarııasynyń 1 myń kósheti otyrǵyzyldy.

Aktsııa sátti aıaqtalǵan soń Dımash Qudaıbergenniń esimine jazylǵan «Orman saqshysy» sertıfıkaty berildi.

Photo: dimashnews.com