Dımash Qudaıbergen jaıly derekti fılm túsirilip jatyr

NUR-SULTAN. QazAqparat - «Qazaqstan» ulttyq arnasy ánshi Dımash Qudaıbergen týraly derekti fılm túsirip jatyr. Bul týraly telearnanyń basqarma tóraǵasy Erlan Qarın Ortalyq kommýnıkatsııalar qyzmetinde ótken baspasóz máslıhatynda aıtty, dep habarlaıdy QazAqparat tilshisi.

«Dımashtyń Nur-Sultanda ótetin kontsertinen basqa taǵy bir jobamyz - ánshi týraly derekti fılm. Ol jóninde biz bir ýaqytta kelistik. Ótken jyly Dımashtyń kontsertin uıymdastyrý jóninde aqyldasyp jatqan ýaqytta, derekti fılm túsirsek degen usynys aıtqan edik. Onyń shyǵarmashylyǵyna qyzyǵýshylyq óte úlken», - dedi «Qazaqstan» RTRK» AQ basshysy Erlan Qarın.

Onyń aıtýynsha, ánshiniń kelisimin alǵannan keıin shaǵyn shyǵarmashylyq top jumysqa kirisip ketken.

«Bul fılmde buryn jarııalanbaǵan túrli beınematerıaldar kórsetiletin bolady. Oǵan daıyndyq barysynda bizdiń komanda ánshiniń Máskeýdegi kontsertine bardy. Áriptesterimen arnaıy suhbattar túsirdi. Máskeýdegi kontsertinen keıin Qytaıǵa saparǵa attanyp, Hýnan arnasyndaǵy úlken shoýǵa qatysty. Biz shoýdyń túsirilimine de qatysyp, ol jaqta da Qytaıdaǵy dostary men áriptesteri tarapynan suhbattardy túsirdik. Árıne, negizgi túsirilim Nur-Sultanda 29 maýsymda ótetin kontsertine baılanysty boldy. Oqıǵa jelisi osynyń negizinde qurylady. Bul - Dımashtyń eń úlken kontserti. Álbette, Dımashtyń álemniń ár túkpirinde kontserti ótip jatyr. Biraq, bul eń aýqymdy kontserti bolady dep oılap otyrmyz», - deıdi Erlan Qarın.

«Qazaqstan» telearnasynyń basqarma tóraǵasy derekti fılm kúzde kórsetiletinin habarlady.

Eske sala ketsek, atalmysh baspasóz máslıhatynda Erlan Qarın Dımash Qudaıbergenniń elordada ótetin jeke kontsertine bıletterdiń 70 paıyzy satylyp ketkenin habarlaǵan bolatyn.

Foto: vk.com/dimashdearseurasianfanclub