Dımash Qudaıbergen jańa ániniń premerasyn jarııalady

ASTANA. KAZINFORM – 30 qańtarda Býdapeshtte shyǵarmashylyq saparda júrgen Dımash Qudaıbergen jankúıerlerine beıneúndeý jasady. Bul týraly dimashnews.com jazdy.

– Qurmetti dostar, meniń súıiktilerim Dears! Búgin 30 qańtar – bizdiń ortaq merekemiz. 2017 jylǵy sol bir este qalarlyq kúnnen bastap, sizderge alǵash ret osylaı Dears dep ataǵanyma búgin 8 jyl tolyp otyr. Osy jyldar ishinde biz kontserttik týrlarymmen Qazaqstannan bastap Azııa, Amerıka, Eýropaǵa deıingi kóptegen qala men elderdi araladyq… Sizderdiń erekshe yqylastaryńyz ben qoldaýlaryńyz úshin, meniń shyǵarmashylyǵyma qyzyǵýshylyq tanytyp, maǵan senim artqandaryńyz úshin sizderge aıtar alǵysym sheksiz. Búgingi týǵan kúnimizben shyn júrekten quttyqtaımyn! Sizderdi jańa kontsertter men qoıylymdarda asyǵa kútemin, - dedi ánshi.

Dımash Qudaıbergen jaqynda jańa týyndysy jaryqqa shyǵatynyn málimdedi.

– Búgin osy merekege oraı jańa ánimizdiń premerasyn jasamaqpyz. 7 naýryzda álemge áıgili kompozıtor jáne prodıýser Valter Afanasevtiń jetekshiligimen halyqaralyq avtorlar ujymy jasaǵan týyndyny jaryqqa shyǵaramyz. Bul – «Love’s not over yet» áni. Sizderge unaıdy degen úmittemin! - dedi.

«Love’s not over yet» áni – Dımash Qudaıbergenniń oryndaýyndaǵy týyndy. Bul týyndyny eki márte Gremmı syılyǵynyń ıegeri atanǵan prodıýser jáne kompozıtor Valter Afanasev bastaǵan halyqaralyq top jazǵan bolatyn. Ándi Dımashtyń erekshe daýysyna arnap Ýolter Afanaseff, Domınık Býs, Flavıen Kompanon sııaqty kompozıtorlar jáne sózin Devon Greıvs jazdy.

Dımash Qudaıbergen, Plasıdo Domıngo, Hose Karreras «Virtuosos» halyqaralyq jobasynda qazylyq etetinin jazǵan bolatynbyz.