Dımash Qudaıbergen Túrkııada jeke kontsertin ótkizedi

ASTANA. QazAqparat – Dımash Qudaıbergen álem elderi boıynsha «Stranger» atty týrnesin jalǵastyrýda. Týrne aıasynda qazaqstandyq ánshi Túrkııada jeke kontsertin ótkizedi, dep habarlaıdy QazAqparat dimash.news Instagram-paraqshasyna silteme jasap.

«»DimashAli«shyǵarmashylyq ortalyǵy 2023 jylǵy 6 mamyrda Túrkııanyń Antalıa qalasyndaǵy Akdenız ýnıversıtetiniń kópfýnktsıonaldy stadıonynda ótetin Dımash Qudaıbergenniń jeke kontserti týraly habarlaıdy», - delingen paraqshada.

Bıletter satylymy https://www.dimashali.com saıtynda Astana ýaqytymen 23 qańtar kúni, saǵat 12:00-de bastaldy.

Akdenız ýnıversıtetiniń kópfýnktsıonaldy stadıony Jerorta teńiziniń jaǵalaýynda ornalasqan. Syıymdylyǵy – 7100 adam.

Aıta keteıik, Dımash «Stranger» álemdik týrnesin Almaty qalasynan bastaǵan bolatyn.

Túrkııadaǵy kontsertine deıin D.Qudaıbergen 29 sáýirde Armenııadaǵy fanattaryn qýantpaq. Kontsert iri keshenderdiń biri, 12 myń kórermenge arnalǵan Karen Demırchıan atyndaǵy sport-kontsert kesheninde ótedi. Bıletterdi aldyn ala satý 31 qańtarda aıaqtalady.

Al 24 maýsymda qazaqstandyq ánshi Malaızııada jeke kontsert berýdi josparlap otyr.