Dımash Qudaıbergen Túrkııada ABU TV Song Festival 2015-te óner kórsetedi
ASTANA. QazAqparat - «Slavıan bazary -2015» halyqaralyq baıqaýynyń jeńimpazy Dımash Qudaıbergen Stambulda ABU TV Song Festival 2015-te án shyrqaıdy. Festıval 28 qazanda ótedi.
«Tanymal juldyzdarmen bir sahnada óner kórsetetin bolamyn. Kontsert álemniń 50 elinde kórsetiledi. Onyń ishinde Iran men Kýveıt te bar. Qazaqstanda «Habar» telearnasy tikeleı efırde kórsetetin bolady. Men halyq áni «Daıdıdaýdy» oryndaıtyn bolamyn», - dep jazdy ánshi Instagramdaǵy óz paraqshasyna.
Azııa-Tynyq muhıttyq 2015 ánder telefestıvali (aǵylshynsha - ABU TV Song Festival 2015) - tórtinshi ret ótýde. Festıval jarys túrinde ótpeıdi. 2015 jylǵy 28 qazanda Stambulda (Túrkııa) ótedi. Shara 25-30 qazan kezeńinde Azııa-Tynyq muhıt habar taratý odaǵynyń (ABU, «AVS») 52-shi assambleıasymen bir ýaqytta ótpek.
D. Qudaıbergen 2010 jyly «Zvonkıe golosa Baıkonýra» halyqaralyq festıvaliniń 1 syılyǵynyń laýreaty bolsa, 2012 jyly «Jas qanat» respýblıkalyq jas oryndaýshylar baıqaýynyń gran-prıin ıelendi. «Shyǵys bazary» halyqaralyq estradalyq oryndaýshylar telebaıqaýynyń 1 syılyǵy laýreatynyń dıplomyn aldy.
