Dımash Qudaıbergen týrıster arasynda Aqtóbe oblysynyń tanymaldyǵyn eseledi - Ońdasyn Orazalın
Kezdesý barysynda áleýmettik-ekonomıkalyq, bilim, mádenı qarym-qatynastar jaıy sóz boldy. Aımaq basshysy Aqtóbe óńirine alǵash ret kelgen Chjan Sıaoǵa oblystyń damý jolyn aıtyp berdi. «Memleket basshysy Qasym-Jomart Toqaev Qytaı Halyq Respýblıkasyna resmı sapary kezinde Qytaı Qazaqstannyń eń iri syrtqy saýda jáne ekonomıkalyq áriptesteriniń biri bolǵanyn málimdedi. Bıylǵy jyldyń 8 aıynda Qytaı men Aqtóbe oblysy arasyndaǵy taýar aınalymy 664,6 mln AQSh dollaryn qurap, bul ótken jyldyń sáıkes kezeńimen salystyrǵanda 34% óskenin kórsetti», - dep atap ótti Ońdasyn Orazalın. Qazaqstan Úkimeti men Qytaı Halyq Respýblıkasynyń Úkimeti arasyndaǵy ındýstrııalandyrý jáne ınvestıtsııalar salasyndaǵy yntymaqtastyqty nyǵaıtý týraly kelisim aıasynda Aqtóbe oblysynda 695 mln AQSh dollaryn quraıtyn 4 joba iske asyrylýda. Sondaı-aq, Ońdasyn Orazalın joǵary tehnologııalyq jobalar ashýǵa nıetti ınvestorlarǵa tolyq jaǵdaı jasalatyndyǵyn, al ınvestorlar tarapynan qyzmetkerlerdiń jalaqysyn arttyrý, qyzmetkerlerdi oqytý, qaýipsizdik tehnıkasy men ekologııalyq talaptar saqtalýy tıis ekendigin aıtty. «Aqtóbe oblysynyń maqtanyshy Dımash Qudaıbergen alǵash ret Qytaıda álemge tanymal boldy. Qytaıdyń jankúıerleri álem boıynsha Dımashpen birge júredi. Osynyń bári týrıster arasynda Aqtóbe oblysynyń tanymaldyǵyn eselep kóteredi», - dedi óńir basshysy. Óz kezeginde QHR Qazaqstandaúy Tótenshe jáne Ókiletti Elshisi Elbasy N.Nazarbaevtyń 27 jyl boıy eki memlekettiń dostyq qarym-qatynasyn nyǵaıtýǵa qosqan zor úlesi men úlgili sara jolyn ári qaraı da jalǵastyrý qajet ekenin jetkizdi. Elshi sondaı-aq, ınvestorlarǵa qatysty aıtylǵan pikirmen kelisetindigin jáne osy baǵytta jumystar jasalatyndyǵyn aıtty. Jıyn sońynda oblys basshysy bul kezdesý ekijaqty mádenı, bilim, áleýmettik ekonomıkalyq salanyń damýyna septigin tıgizerine senim bildirdi.
