Dımash Qudaıbergen týraly «Sheksiz mýzyka» atty kitap jaryqqa shyqty
ASTANA. KAZINFORM – Qazaqstandyq tanymal ánshiniń shyǵarmashylyq jolyna arnalǵan jańa biregeı basylym – «Dımash Qudaıbergen: Sheksiz mýzyka» atty kitap-albomdy kópshilik nazaryna usynyldy. Bul týraly dimashnews.com jazdy.
Óneri jyldar boıy álemniń túrli óńirindegi tyńdarmandardy biriktirip kele jatqan ártistiń kásibı qalyptasýy osy eńbekte jan-jaqty qamtylǵan.
Kólemi 289 betten turatyn albom Dımashtyń shyǵarmashylyq qyzmetine kópqyrly kózqaraspen qaraýǵa múmkindik beredi. Basylymǵa arhıvtik fotosýretter, kontsertterden alynǵan materıaldar, sondaı-aq oryndaýshynyń jeke estelikteri men túsindirmeleri engizilgen. Bul derekter oqyrmanǵa ártistiń kásibı damýyn kezeń-kezeńimen baqylap, buryn jarııalanbaǵan shyǵarmashylyq sátterimen tanysýǵa múmkindik beredi.
Kitap qurylymy mýzykanttyń ómir joly men kásibı ósýindegi negizgi kezeńderdi sıpattaıtyn taqyryptyq bólimderden turady. Onda oryndaýshynyń halyqaralyq deńgeıde tanylýy, onyń otbasy men ónerpazdyq bastaýlary, álemniń asa iri kontserttik alańdaryndaǵy óner kórsetýi, mádenı jobalarǵa qatysýy, tyńdarmandarymen baılanysy jáne shyǵarmashylyq joly týraly taraýlar qamtylǵan. Sonymen qatar basylymda sahna syrtyndaǵy jumys úderisi men mańyzdy oqıǵalardyń hronologııasyna arnalǵan arnaıy bólimder berilgen.
Basylym qazaq, orys jáne aǵylshyn tilderinde usynylǵandyqtan, ártúrli aýdıtorııaǵa qoljetimdi ári qazaqstandyq mádenıettiń keńinen tanystyrylýyna septigin tıgizedi.
Kitap qazirgi ýaqytta «Almatykitap baspasy» fırmalyq dúkenderine tústi.
Eske sala keteıik, buǵan deıin Dımash Qudaıbergenniń «Grammy Global Spin» halyqaralyq jobasyna qatysqanyn jazǵanbyz.