Dımash Qudaıbergen «Taý ishinde» ánine beınebaıan túsirdi
ASTANA. KAZINFORM — 15 mamyrda Dımash Qudaıbergen belgili qazaq aqyny ári jazýshysy, qazaq ádebıetiniń negizin salýshylardyń biri Sáken Seıfýllınniń ánine túsirilgen jańa beınebaıannyń tusaýyn kesti.
«Taý ishinde» premerasy qarsańynda DimashNews redaktsııasy beınebaıannyń rejısseri Ǵalym Asylovtan jáne mýzykalyq fılmde basty róldi somdaǵan aktrısa Aıym Seıitmetovadan suhbattasty
Rejısser Ǵalym Asylovtyń sózinshe, beınebaıanda Dımashty erekshe janrda túsirip, kórermendi tańǵaldyrǵysy kelgenderin aıtady.
— Áýeli, árıne, ándi oryndap aldyq. Biz stsenarııdi basqasha jazyp, Dımashty erekshe janrda túsirip, kórermendi tań qaldyrǵymyz keldi. Ánshi budan buryn horror, ekshn, ǵaryshtyq fantastıka janrynda beınebaıandarǵa túsip kórgen, sol sebepti bul joly komedııa janrynda baıqap kórýdi jón kórdik, — dedi ol.
Asylov túsirilimde eń qıyn, qyzyqty jáne este qalǵan qandaı erekshe sátter bolǵanyn aıtyp berdi.
— Dımashtyń beınesin basqa keıipkerlermen úılestirý ońaı is emes edi, nátıjesi standartqa saı kelmeýi múmkin, biraq bári oıdaǵydaı boldy dep oılaımyn. Ásirese, ákesi men sheshesi bolyp oınaǵan basty róldegi keıipkerlerdiń oıyny, olardyń kásibı sheberligi meni tańǵaldyrdy. Bir qyzyǵy, beınebaıannyń alǵashqy kórinisterindegi sózderdi túsirilim alańyndaǵy akterlar ımprovızatsııalaǵan, — dedi maman.
Rejısser basty rólderge akterlerdi qalaı tańdalǵanyn aıtty.
— Dımash birden akterlik otbasyǵa usynys jasady, bul árıne, tamasha sheshim boldy. Ol otbasy Dımashty bala kezinen biledi, ıaǵnı otbasylyq dostar, — dep túsindirdi Ǵalym Asylov.
Dımashtyń jańa beınebaıanynda ata-anasy, tanymal ártister Azat Seıitmetov jáne Danagúl Temirsultanovamen birge qazaqstandyq aktrısa ári bloger Aıym Seıitmetova tústi.
Aıym QazUÓÝ-di «Mýzykalyq teatr ártisi» mamandyǵy boıynsha bitirgen. Aktrısa komedııalyq jáne melodramalyq serıaldar men fılmderdegi rólderimen tanymal. Ol: «Kvartıranttar», «Toı lıýboı tsenoı», «Jibek», «Shekarasyz mahabbat» jáne t. b. kınolarda oınaǵan.
Aıym beınejazbany túsirý jumysynyń qalaı bastalǵanyn aıtty.
— Maǵan anam habarlasyp, Dımashtyń klıpyna túspekshi bolyp jatqandaryn jáne maǵan basty rólde oınaýdy usynǵany týraly aıtty. Anam meniń kontaktimdi ánshige berip qoıǵanyn jáne olardyń jaqyn arada maǵan qońyraý shalatyny týraly eskertti. Stsenarııdiń óte qyzyqty ekenin jáne meniń kelisimimniń mańyzdy ekenin aıtty. Ata-anamdy da klıpke qatysýǵa shaqyrypty. Stsenarıı shynymen de óte qyzyqty eken. Men birden bul jobaǵa qatysý týraly usynysty qýana qabyldadym, — deıdi aktrısa.
Óner ıesi ata-anasymen jumys isteý qundy dúnıe ekenin atap ótti.
— Men ata-anammen birge túsirilimderge túskendi jaqsy kóremin. Olardyń janynda ózimdi erekshe jaıly sezinemin. Olar árdaıym qoldap, keńesterin berýden aıanbaıly. Árıne, olardyń tájirıbesi de mol. Bir kadrǵa birge túsý óte qundy dúnıe. Óıtkeni bul da bizdiń otbasy tarıhymyzdyń uzaq jyldar boıyna saqtalatyn esteligi. Kınodaǵy eń alǵashqy rólimde ákemmen birge túsken bolatynmyn. Ol stsenarıı boıynsha maǵan ákemdeı bolǵan aǵa rólin oınaǵan bolatyn. Onyń meni sol kezdegi qoldaýyn eshqashan umytpaımyn. Ata-anammen bir kadrda oınaǵanyma erekshe qýanyshtymyn, — dedi ol.
Ol Dımashpen alǵash ret túsirilim alańynda jumys istegende alǵan áserimen bólisti.
— Dımash — óte muqııat, qamqor jan, sondaı-aq, onymen áńgimelesý óte qyzyqty. Ol bárine kóńil bólýge tyrysady. Osy úsh kúndik túsirilimde ujymmen birge ótkizgen az ǵana ýaqytymyzda — qanshama emotsııalar, jylýlyq pen jaqsy energııaǵa toly sátter kóp boldy. Dımashpen jáne onyń komandasymen jumys isteý maǵan qatty unady. Ol kóńildi, talantty jáne eńbekqor, sondaı-aq ıýmordy erekshe túsinetin tamasha adam. Elimizdiń naǵyz maqtanyshy! Osyndaı ánshiniń beınebaıanyna túsý biz úshin úlken mártebe, — dep túıindedi Aıym Seıitmetova.
Aıta keteıik, Dımash Qudaıbergen «Taý ishinde» atty jańa ánine chellendj jarııalady.
Osyǵan deıin Brazılııada Dımashtyń sýretimen bezendirilgen avtobýstar paıda bolǵanyn jazdyq.