Dımash Qudaıbergen tanymal Mask Singer shoýynda óner kórsetti

NUR-SULTAN. QazAqparat – Qazaqtyń tanymal ánshisi Dımash Qudaıbergen Qytaıda ótken Betperde kıgen ánshi (Mask Singer) shoýyna qatysty. Shoý birneshe saǵat buryn Qytaı televıdenıesiniń efırinen kórsetildi, dep habarlaıdy «QazAqparat» HAA ánshiniń Instagram paraqshasyna silteme jasap.

Joba efırge shyqqanǵa deıin ánshi áleýmettik jelige ondaǵy sýretterin jarııalady, al efır kúni ózi aıtqan ánniń úzindisin bólisti. Dımash Qudaıbergen shoýda Qyran beınesinde birneshe án aıtty.

Mask Singer – qytaıdyń vokaldyq realıtı shoýy. Oǵan qatysqan tanymal tulǵalar ózin tanytpas úshin betperde kıip alady. Shoýdy Lı Hao júrgizedi. Ánshilerdiń ónerin qazylar alqasy baǵalap otyrady. Shoýdyń tusaýkeseri 2016 jylǵy 18 qyrkúıekte Jiangsu Television-da bolǵan.

Dımashtyń beınejazbasyn segiz saǵatta 114 myń adam kórgen.

Byltyr daryndy ánshi qytaıdyń iQiYi platformasyna shyǵatyn «Idol Hits» shoýyna qatysqan. Onda Dımash rep oqyp, jankúıerlerin tańǵaldyrǵan.

Alda Dımash Qudaıbergen Japonııadaǵy ABU TV Song Festival 2019 jobasyna arnaıy shaqyrylǵan qonaq retinde qatysady. Kontsert Tokıoda 19 qarashada bolady.

Al 10 jeltoqsanda ánshi Nıý-Iorktegi Barclays Center-de «Arnau tour ENVOY» kontsertin ótkizedi.