Dımash Qudaıbergen sý tasqynynan zardap shekken jerlesterin qoldap keldi

AQTÓBE. KAZINFORM — Ánshi Dımash Qudaıbergen týǵan jeri Aqtóbege keldi. Ol saıajaı aýmaǵynda turatyn, biraq qazir baspanasyn tastap № 40 mektepte ýaqytsha turyp jatqan turǵyndarmen kezdesti. Osylaısha qıyn sátte jerlesterimen birge ekenin jetkizip, qaıyrymdylyq qoryna qarjy aýdardy.

Elimizde sý tasqyny bastalǵan kezde halyqty sabyrǵa shaqyryp, óziniń qaı sátte de qoldaýǵa ázir ekenin jetkizgen ánshi Dımash Qudaıbergen búgin Aqtóbe oblysyna keldi.

Ol aldymen baspanasyna sý kirgen qamkóńil jerlesterine demeý bolyp, olardyń janynan tabyldy.

Jyly sózin arnap, Memleket basshysy Qasym-Jomart Toqaevtiń tapsyrmasy negizinde eldegi atqarylyp jatqan isterge toqtaldy.

— Bala kezden bastap tileýimdi tilep, bıikke qanat qaǵyp, qalyqtap júrsin degen tilek tilep júrgen jerlesterimniń qal-jaǵdaıyn bilmeı kete almadym. Jańalyqtardan memleket tarapynan aýqymdy somada kómek berilip jatyr degendi oqyp jatyrmyn. Eń bastysy, elimiz aman bolsyn, jurtymyz tynysh bolsyn, — dedi ánshi.

Ózi de ıgi isten shet qalmaı, týǵan jerine sapary barysynda qaıyrymdylyq qorǵa aqsha aýdardy.

Tipti kún-tún demeı tynymsyz eńbek etip, sý tasqyny kezinde bel jazbaı kómektesip júrgen eriktilermen kezdesti.

Gýmanıtarlyq kómek berý ortalyǵynyń úılestirý jumysymen tanysty.

Bul aqtóbelikter úshin úlken demeý, qoldaý sapary boldy. 

Aıta keteıik, Aqtóbe oblysy boıynsha «Anaǵa taǵzym» ortalyǵy negizgi gýmanıtarlyq kómek qabyldaý orny dep bekitildi.

Munda qazir Atyraý, Mańǵystaý, Túrkistan, Qyzylorda oblystarymen qatar Qyrǵyzstannan da kómek kelip, qabyldandy.

Osy ortalyqtaǵy eriktiler azyq-túlik, kıim-keshek pen tósek-oryndy, gıgıenalyq zattardy suryptap, ázirleıdi.

Suranys túsken sátte birden jınaqtap, júk kólikterine tıep beredi. Al tasymaldaý qyzmetine avtoeriktiler jumyldyrylǵan.

Sý tasqyny bastalǵannan beri 8600 volonter táýlik boıy jumys istedi. Qazirgi tańda gýmanıtarlyq kómek ortalyǵyna jetkizilgen 170 tonna azyq-túlik jáne 50 tonna taýar aýdandarǵa taratyldy. 

Eske salsaq, Aqtóbe oblysy boıynsha sý tasqyny kezinde zardap shekken aýdan balalary Talǵardaǵy demalý lagerine joldama berildi. Onda 11 oqýshy attandy.

Sonymen birge Sh. Bersıev atyndaǵy orta mekteptiń bitirýshi túlekteri oblys ortalyǵyna kelip, oqyp júr.