Dımash Qudaıbergen Stranger kontserti týraly derekti fılmniń treılerin qashan jarııalaıdy
ASTANA. KAZINFORM – Qazaqstandyq tanymal ánshi Dımash Qudaıbergen Nıý-Iorktegi áıgili Madison Square Garden sahnasynda ótken Stranger kontsertine arnalǵan derekti fılmniń treıleri jaqyn kúnderi jarııalanatynyn málimdedi.
Óner ıesi áleýmettik jelidegi paraqshasynda kópshilik kontserttiń ózin kórgenimen, onyń sahna syrtyndaǵy daıyndyǵy men oǵan deıingi uzaq jol beımálim bolyp kelgenin aıtty.
– Jastaıymnan maǵan er adam úshin mundaı joǵary vokaldyq dıapazonnyń erekshe qubylys ekenin jıi aıtatyn. Jyldar óte men týraly túrli teorııalar men boljamdar paıda boldy. Bireýler meni prodıýserlerdiń jobasy dep qabyldasa, endi bireýler tabysymnyń artynan túrli yqpaldy adamdardy izdedi. Alaıda sol ýaqytta biz bul joldy ózimiz júrip ótip, ózimiz jasap jattyq, – dep jazdy Dımash Qudaıbergen.
Ánshiniń aıtýynsha, bul joly ol alǵash ret kameralarǵa ózi men otbasysy jáne komandasy ǵana biletin sátterdi túsirýge múmkindik bergen.
Fılmde daıyndyq barysy, sahna syrtyndaǵy ómir, tolǵanys pen kúmán, úlken jaýapkershilik jáne osy ýaqytqa deıin kópshilikke kórsetilmegen oqıǵalar qamtylǵan.
– Bul fılm áldekimderdiń mıfteri men joramaldary týraly emes. Bul – shyn máninde ne bolǵanynyń kórinisi. Ómirimdegi eń mańyzdy kontsertterdiń birine deıingi kúnder men aılar týraly. Armannyń tarıhqa aınalǵan sáti týraly syr shertedi, – dedi ol.
Dımash Qudaıbergenniń habarlaýynsha, derekti fılmniń resmı treıleri 8 maýsym kúni saǵat 18:00-de jarııalanady.
Aıta keteıik, Madrıdte Dımash Qudaıbergen týraly derekti fılmniń tusaýkeseri ótti.
