Dımash Qudaıbergen «Singer» baıqaýynyń kelesi kezeńinde qytaısha án aıtady

ASTANA. QazAqparat - Qytaıdyń «Hýnan TV» telearnasyndaǵy «Singer-2017» án baıqaýyna qatysyp jatqan qazaqstandyq ánshi Dımash Qudaıbergen jobanyń segizinshi kezeńinde qytaı tilinde án aıtady, dep habarlaıdy QazAqparat.

Segizinshi kezeńniń túsirilim jumystary erteń bastalady. Búgin baıqaýǵa qatysýshylar Sina weibo áleýmettik jelisinde ózderiniń kelesi kezeńde shyrqaıtyn ánderin aıtyp, jattyǵý jasaǵandaryn jazýda. Otandasymyz bul kezeńde qytaılyq tanymal ánshi Han Hýnnyń  «Tań atty» ánin oryndamaqshy.

 

Aıta keterligi, Han Hýn «I am singer» baıqaýynyń úshinshi maýsymynyń jeńimpazy. Ol jobanyń birinshi kezeńinde óziniń «Tań atty» ánin shyrqap, birinshi orynnan kóringen.

Dımash qytaılyq BAQ-tarǵa bergen suhbatynda Han Hýndy jaqsy biletinin, sondaı aq, onyń ánderin jaqsy kóretinin aıtqan bolatyn. Otandasymyz bul ándi «I am singer» jobasyna qatyspaı turyp oryndaǵan edi.

Eske sala keteıik, jobanyń jetinshi kezeńi 4 naýryz kúni efırden kórsetiledi. Bul kezeńde Dımash qazaqtyń "Daıdıdaý" ánimen úshinshi oryndy ıelendi.