Dımash Qudaıbergen sheteldikterdiń qazaq mádenıetine qyzyǵýshylyǵy artqanyn aıtty
ASTANA. KAZINFORM – Dımash Qudaıbergen sheteldik kórermenderdiń qazaq mádenıetine, el tarıhyna jáne ulttyq aspaptarǵa qyzyǵýshylyǵy artyp kele jatqanyn aıtty. Bul týraly ánshi Astana Finance Days aıasyndaǵy paneldik sessııada sóz qozǵady.
Dımash Qudaıbergenniń aıtýynsha, halyqaralyq aýdıtorııaǵa qazaq mýzykasyn keńinen tanystyrý onyń shyǵarmashylyǵyndaǵy mańyzdy baǵyttardyń birine aınalǵan. Osy maqsatta ánshi álemniń túrli elderindegi kontsertterinde óz komandasyndaǵy mýzykanttarmen birge qazaqtyń ulttyq aspaptaryn da tanystyryp júr.
Ol halyqaralyq gastrolder kezinde kórermenderdiń ulttyq aspaptarǵa erekshe yqylas tanytatynyn baıqaǵan.
— Kontsertterimde óner kórsetetin mýzykanttarymyz qazaqtyń ulttyq aspaptaryn halyqaralyq aýdıtorııaǵa tanystyryp júr. Álemniń qaı jerinde óner kórsetsek te, kórermender basqa eldiń mádenıetinen kórgen jańalyqty qyzyǵýshylyqpen qabyldaıdy. Bul qyzyǵýshylyq kontsertpen ǵana shektelmeıdi. Sheteldik tyńdarmandar arasynda Qazaqstannyń tarıhyn zerttep, qazaq tilin, tipti ulttyq aspaptarda oınaýdy úırenip júrgender bar, — dedi ol.
Dımash Qudaıbergen qazaq mýzykasy men ulttyq aspaptaryn álemge tanytý jumysyn odan ári keńeıtkisi keletinin jetkizdi.
Onyń aıtýynsha, prodıýserlik baǵytqa bet burýyna qazaq mýzykasyn álemge keńirek tanytý maqsaty túrtki bolǵan.
Eske salaıyq, munyń aldynda Dımash Qudaıbergen kelisimsharttyń barlyq talabyn tolyq túsinbeıinshe oǵan qol qoımaıtynyn aıtqan edi.
