Óner adamy qarjylyq sheshimderdi ózgege tolyq tapsyryp qoımaýy kerek — Dımash Qudaıbergen
ASTANA. KAZINFORM — Óner adamy shyǵarmashylyq erkindigin jáne zııatkerlik menshik quqyǵyn saqtaý úshin qarjy men kelisimshart máselelerinen habardar bolýy kerek. Bul týraly ánshi Dımash Qudaıbergen Astana Finance Days aıasyndaǵy paneldik sessııada aıtty.
Sessııa barysynda shyǵarmashylyq ındýstrııaǵa ınvestıtsııa tartý, ınvestormen jumys isteý jáne óner adamynyń zııatkerlik menshik quqyǵyn qorǵaý máseleleri talqylandy.
Dımashtyń aıtýynsha, ınvestormen jumys isteýdiń barlyǵyna ortaq bir úlgisi joq. Keıbir óner adamdary ınvestıtsııa úshin zııatkerlik menshik quqyǵynyń bir bóligin berýge kelisse, endi biri shyǵarmashylyq erkindigi men zııatkerlik menshik quqyǵyn saqtaýdy tańdaıdy.
— Bul — ár óner adamynyń jeke tańdaýy. Barlyǵyna birdeı keletin tásil joq. Keıbir óner adamdary ınvestıtsııa úshin zııatkerlik menshik quqyǵynyń bir bóligin berýge kelisse, endi biri shyǵarmashylyq erkindigi men zııatkerlik menshik quqyǵyn saqtaýdy tańdaıdy. Men ekinshi joldy tańdadym. Óıtkeni men úshin shyǵarmashylyq erkindigimdi de, zııatkerlik menshik quqyǵymdy da saqtaý mańyzdy, — dedi ol.
Sondyqtan ánshi kelisimsharttyń barlyq talabyn tolyq túsinbeıinshe oǵan qol qoımaıtynyn jetkizdi.
— Óner adamy qarjylyq máselelerdi tek menedjerge nemese zańgerge tapsyryp qoımaı, kelisimsharttyń sharttaryn, tabystyń qalaı bólinetinin jáne óziniń quqyqtaryn jaqsy bilýi tıis. Ol óz salasyndaǵy qarjy máselelerinen habardar bolsa, «bul jerde tártip osyndaı» nemese «leıbldiń talaby solaı» degenge kóne salmaıdy. Kelissóz júrgizip, ózi úshin qaı talaptyń mańyzdy ekenin, qaısysyna kelise almaıtynyn naqty bilýi kerek, — dedi Dımash Qudaıbergen.
Ol mundaı bilimdi tek menedjer nemese zańgerdiń mindeti dep qarastyrý durys emes ekenin aıtty.
— Bul salada saýatty bolý óte mańyzdy. Qarjy, kelisimder men túrli talaptardyń qalaı jumys isteıtinin bilý qajet. Bul tek menedjerdiń nemese zańgerdiń jumysy emes. Muny bilý — óner adamynyń kásibı jaýapkershiliginiń bir bóligi, — dedi ánshi.
Sonymen qatar ol qazaqstandyq mádenıet, tarıh pen mýzykanyń ózindik ereksheligi halyqaralyq aýdıtorııa úshin qyzyqty ekenin atap ótti. Onyń sózinshe, otandyq ónerpazdardyń syrtqy naryqqa shyǵýy úshin quqyqtyq qorǵaý jáne shyǵarmashylyq ındýstrııany damytýǵa baǵyttalǵan arnaıy qorlardyń qoldaýy qajet.
— Mundaı qorlar ınvestorlar men óner adamdarynyń arasyn baılanystyratyn kópir bola alady, — dedi Dımash Qudaıbergen.
Aıta keteıik, búgin elordada Astana Finance Days forýmy ótip jatyr. Bıylǵy is-sharaǵa álemniń 90 elinen 8 myńǵa jýyq qatysýshy tirkelgen. Forým aıasynda Qazaqstannyń taý-ken jáne kreatıvti ındýstrııa salasyndaǵy jobalary sheteldik ınvestorlarǵa tanystyrylyp jatyr.
