Dımash Qudaıbergen ómirden ozǵan ákesine án arnaǵan aqtóbelikti marapattady
Búgin Aqtóbe qalasynda «Baqytty bala» baıqaýy qorytyndylandy. Ánshi Dımash Qudaıbergen baıqaýdyń aqyldastar alqasynda bolyp, óziniń kóńilinen shyqqan ónerpaz Narǵyz Januzaqovaǵa erekshe syı jasady.
«Baqytty bala» baıqaýyna qatysqan ár bala ónerli, talantty. Ánshi osy balalardaı bolýy kerek. Naǵyz qazaq estradasynyń maıtalmandary ósip kele jatyr. Táýelsiz sarapshy múshesi bolyp, bárin tyńdadym. Іshimdegini jetkize almaımyn, bári talantty. Tańdaý qıyn bolsa da júlde Narǵyz Januzaqovaǵa beriledi. Qazir men álemdik týrnege shyǵyp, jeke kontsertimdi berip júrmin. Arnaıy marapat alǵan Narǵyz bir kontsertime qatysyp, án aıtady»,- dedi ánshi Dımash Qudaıbergen.
Aıta keteıik, 12 jastaǵy Narǵyz Januzaqova Aqtóbe qalasyndaǵy №60 orta mektepte oqıdy. Baıqaý kezinde ol ándi óz ákesine arnady.
«Men qýanyshtymyn. Sezimimdi sózben aıtyp jetkizý múmkin emes. Bul anam men ákemniń armany oryndalǵan kún. Baıqaý men úshin eń úlkeni, mańyzdysy boldy. Ár balaǵa baqyt, dostyq syılaǵan baıqaýda bas júlde de aldym. Biraq men úshin Dımash Qudaıbergenniń bergen syıy mańyzdy, baǵaly. Qanat pen Sveta Aıtbaevtarǵa alǵysymdy aıtamyn»,- dedi Narǵyz Januzaqova. Baıqaý jeńimpazy óz ánin qaza bolǵan ákesine arnap, kórermenniń júreginen oryn aldy.
«Ákem tórt jyl buryn ómirden ozdy. Ol ánshi, juldyz bolǵanymdy qalaǵan edi»,- dedi ol.
