Dımash Qudaıbergen Nıý-Iorktegi áıgili Madison Square Garden sahnasynda jeke kontsert ótkizedi

ASTANA. KAZINFORM – 2025 jyldyń 5 qazanynda áıgili Madison Square Garden sahnasynda alǵash ret TMD eliniń ónerpazy jeke kontsertin ótkizedi.

Ár shyǵarmasy neoklassıkalyq stılimen tanymal qazaqstandyq ánshi ári kompozıtor, mýltı-aspapshy jáne prodıýser Dımash Qudaıbergen Nıý-Iorkte «Stranger» atty álemdik týrynyń arnaıy baǵdarlamasyn usynady.

– 2025 jyldyń 5 qazanynda Nıý-Iorkte Madison Square Garden saraıynda kezdeskenshe, - dep jazdy ánshi áleýmettik jelidegi paraqshasynda.

Nıý-Iorktegi áıgili Madison Square Garden sahnasynda ańyzǵa aınalǵan ártister men toptar óner kórsetken. Olar: Elvıs Preslı, Maıkl Djekson, Elton Djon, Madonna, Beıonse, Djastın Tımberleık, Ledı Gaga, Teılor Svıft, The Rolling Stones, Led Zeppelin, U2, Queen, Metallica, KISS jáne basqa da kóptegen álem juldyzdary.

Aıta keteıik, Dımash Lara Fabıannyń Londondaǵy kontsertinde arnaıy qonaq retinde óner kórsetti.

22 shildede Qyrǵyzstannyń Cholpon-Ata qalasyndaǵy Dúnıejúzilik kóshpendiler oıyndarynyń ortalyq ıppodromynda «Meıkın Azııa» IV halyqaralyq mýzyka festıvaliniń saltanatty fınaly ótti.

Festıvaldiń jabylý saltanatynda Qyrǵyz Respýblıkasy Prezıdenti Sadyr Japarovtyń jarlyǵyna sáıkes, Qazaqstannyń halyq ártisi, ánshi ári kompozıtor Dımash Qudaıbergenge «Qyrǵyz Respýblıkasynyń halyq ártisi» qurmetti ataǵy berildi.