Dımash Qudaıbergen Nıý-Iorktiń áıgili arenasynda jeke kontsertin berdi
ASTANA. KAZINFORM — Nıý-Iorktiń áıgili Madison Square Garden arenasynda alǵash ret Qazaqstannyń Memlekettik Ánurany oryndaldy, dep habarlaıdy Dimashnews.
Dımash Qudaıbergen «Stranger» atty jeke kontsertimen myńdaǵan kórermenniń aldyna shyqty.
— Men kishkentaı kezimnen osynda óner kórsetýdi armandadym. Boks jankúıeri retinde Madison Square Garden óner kórsetken Muhammed Álı men Maık Taıson meni shabyttandyrdy. Sondaı-aq ańyzǵa aınalǵan ónerpazdar — tenor trıosy, Maıkl Djekson, Ýıtnı Hıýston, Selın Dıon, Andrea Bochellı ánshi bolýyma kómektesti. Sońǵy jyldary meniń ómirimde kóp oqıǵalar oryn alyp jatyr. Biraz úlken qoıylymdar, búkil álemde úlken kontsertter berildi. Biraq bul joly sál ózgeshe bolady, — dedi Dımash kontsert aldynda.
Bul kontsert shynynda erekshe boldy. Dımash Qudaıbergen bastaǵan qazaqstandyq komanda kórermenderge esten ketpes kesh syılady.
Biregeı «Stranger» baǵdarlamasy Dımashtyń ózge de shyǵarmashylyq kesh sııaqty stılderdiń, tilderdiń, janrlardyń jáne alýan túrli qoıylymdardyń úılesimi boldy.
Dımash keshti «Golden» qoıylymymen bastap, aǵylshyn tilinde «Smoke», ıtalıan tilinde «Olımpıko» jáne «Battle of Memory» ánin qytaı tilinde shyrqady.
Alǵash ret jeke kontsertte Gremmı syılyǵynyń eki dúrkin ıegeri, avtor Ýolter Afanasevtiń fortepıanoda súıemeldeýimen «Love’s not over yet» shyǵarmasy oryndaldy.
— Men Dımashty bilemin, biraq onyń barlyq ánin bilmeıdi ekenmin. Onyń jandy daýysta án shyrqap jatqany meni tańqaldyrady. Ol óz ónerimen bárin súısindire aldy. Kórermen ony shyn jaqsy kóredi. Men mundaı jaǵdaıdy kóp kezdestirmeımin. Men kontsertti kórip otyryp, "bul ándi kim jazdy, al mynany she?" dep suraýmen boldym. Bizdi shaqyrǵanyna qýanyshtymyn. Bul meniń máńgi jadymda qalatyn estelik boldy. Men bul arenada birneshe ret óner kórsettim, biraq buryn-sońdy mundaı keshti bastan ótkizgen emespin. Bul úlken qurmet, men óte qýanyshtymyn, — dedi Ýolter Afanasev.
Keshte Dımash maestro Igor Krýtoıdyń «Lıýbov ýstavshıh lebedeı» shyǵarmasyn oryndady. Ádettegideı, kórermender ándi birneshe ret ánshimen birge shyrqady.
Aıta keteıik, Dımash Nıý-Iorkte qazaq mádenıetin damytatyn uıymdarmen kezdesti.