Dımash Qudaıbergen naýryz aıynda Dýbaıda jeke kontsert beredi

NUR-SULTAN. QazAqparat – Qazaqstandyq ánshi Dımash Qudaıbergen aldaǵy naýryz aıynda Birikken Arab Ámirlikterinde jeke kontsert ótkizedi. Ánshi bul týraly Instagram-paraqshasynda jazdy, dep habarlaıdy QazAqparat.

«25 naýryzda eki jyldyq pandemııadan keıin Dýbaı qalasyndaǵy Coca Cola arenada ótetin úlken jeke kontsertimniń ótetindigin habarlaımyn. Bıletter storıs pen profıl siltemesinde. Kóriskenshe, dostar!», - dep jazdy ol.

Sondaı-aq D.Qudaıbergen Instagram-paraqshasy buǵattalǵanyn aıtty.

«Ózderińizben birazdan beri baılanysý múmkin bolmady. Meni izdep jazǵan tolassyz hattaryńyz ben qoldaýlaryńyz úshin myń alǵys!», - deıdi ol.

Buǵan deıin mánerlep syrǵanaýdan álem chempıony Anna Şerbakova Eýropa chempıonatynda Dımash Qudaıbergenniń oryndaýyndaǵy «Ave Marııa» kompozıtsııasyna óner kórsetkenin jazǵan bolatynbyz.