Dımash Qudaıbergen men Samal Eslıamova TÚRKSOI marapattaryna ıe boldy
ASTANA. KAZINFORM – Elordada TÚRKSOI halyqaralyq uıymynyń marapattaryn tabystaý rásimi ótti. Qazaqstannyń halyq ártisi Dımash Qudaıbergen túrki álemi mádenıetin damytýǵa qosqan eleýli úlesi úshin TÚRKSOI uıymynyń eń joǵary nagradasy sanalatyn «Túrki áleminiń mádenı elshisi» ataýly ordenimen marapattaldy.
Sondaı-aq Qazaqstannyń eńbek sińirgen qaıratkeri, aktrısa Samal Eslıamovaǵa túrki jáne álemdik kıno óneriniń damýyna qosqan aıryqsha úlesi úshin «Túrki áleminiń úzdik ártisi» nomınatsııasy boıynsha TÚRKSOI-dyń arnaıy júldesi tabystaldy.
QR Premer-Mınıstriniń orynbasary – Mádenıet jáne aqparat mınıstri Aıda Balaevanyń atynan óner ıelerin QR Mádenıet jáne aqparat vıtse-mınıstri Aıbek Sydyqov quttyqtap, olardyń jetistikteri túrki álemi elderi arasyndaǵy mádenı baılanystardy nyǵaıtýǵa jáne qazaqstandyq ónerdiń halyqaralyq deńgeıde tanylýyna zor úles qosyp otyrǵanyn atap ótti.
TÚRKSOI uıymynyń Bas hatshysy Sultan Raev marapattardyń mańyzyna toqtalyp, qazaqstandyq mádenıet qaıratkerleriniń ortaq túrki mádenı keńistigin nyǵaıtýdaǵy róli týraly aıtty.
– Búgin biz óner arqyly túrki álemin shynaıy biriktirip júrgen tulǵalardy qurmettep otyrmyz. Dımash Qudaıbergen mýzyka arqyly mádenı elshi mıssııasyn atqaryp keledi. Al, Samal Eslıamova qazaqstandyq kıno óneriniń sımvolyna aınaldy. Bul marapattar – olardyń eńbegine berilgen laıyqty qurmet, - dedi TÚRKSOI Bas hatshysy.
Óz kezeginde Dımash Qudaıbergen marapatty qabyldaı otyryp, óner adamy úshin eń úlken marapat – halyqtyń qoldaýy ekenin atap ótti.
– Óner adamy úshin eń joǵary marapat – halyqtyń moıyndaýy men qoldaýy. Bul marapatty men elderimiz arasyndaǵy dıplomatııalyq qarym-qatynastardyń nyǵaıýyn bildiretin mańyzdy belgi retinde qabyldaımyn. Bul marapat jeke ózime emes, búkil qazaq halqyna kórsetilgen qurmet pen iltıpat dep bilemin, - dedi óner ıesi.
Aıta keteıik, Dımash bul marapatqa ıe bolǵan ekinshi tulǵa. Buǵan deıin mundaı ataq Túrkııanyń Nobel syılyǵynyń laýreaty, professor Azız Sandjarǵa berilgen bolatyn.
