Dımash Qudaıbergen Meksıkada otandastarymen kezdesip, sábıdiń tusaýyn kesti
ASTANA. KAZINFORM – Álemge áıgili ánshi Dımash Qudaıbergen Qazaqstannyń Mehıkodaǵy Elshiliginde bolyp, qazaqstandyq dıaspora ókilderimen kezdesti.
QR Syrtqy ister mınıstrligi málimetinshe, Dımash Qudaıbergen Mehıkoǵa 8 jáne 10 qazanda ótken kontserttik qoıylymdar aıasynda keldi. Ánshiniń qoıylymdary 25 myńnan astam kórermen jınap, Latyn Amerıkasyndaǵy jankúıerleri úshin mańyzdy oqıǵa boldy.
Týr barysynda Qazaqstan Respýblıkasynyń izgi nıet Elshisi retinde ártis óńirdegi elimizdiń mádenıeti men tarıhyn belsendi túrde nasıhattady.
Qazaq dástúri men mádenıetin ilgeriletý aıasynda Elshi Almurat Turǵanbekovpen toǵyzqumalaq oınap, sondaı-aq bir jasar qazaqstandyq Halıd Iyldyzdyń «tusaýkeser» rásimi kezinde oǵan batasyn berdi.
Sonymen qatar, BUU janyndaǵy Halyqaralyq kóshi-qon uıymynyń izgi nıet Elshisi retindegi mıssııasy aıasynda Dımash Qudaıbergen soǵystyń joıqyn saldary týraly toqtala kele, beıbitshilikke, ózara túsinistikke jáne qaqtyǵystardyń aldyn alý jáne turaqtylyqty ilgeriletý boıynsha birlesken kúsh-jiger biriktirýge shaqyrdy.
Jankúıerler ánshige, onyń otbasy men komandasyna tereń rızashylyq bildirip, kóptegen kádesyı men táttiler syılady.
Aıta keteıik, Dımash Qudaıbergenniń Mehıkodaǵy kontserti anshlagpen ótti.