Dımash Qudaıbergen: Máskeýdegi jeke kontsertimde jańa ánder shyrqalady
«22 naýryz kúni Máskeýdegi Kreml saraıynda meniń Reseıdegi eń alǵashqy jeke án keshim ótkeli jatyr. Ol kontserttiń burynǵy keshterden ózgeshe tustary kóp. Óıtkeni, men kontserttik baǵdarlamany jasaǵan kezde ár qalaǵa, ár elge baılanysty kishkene ózgerister engizemin. Sol sebepti, Reseıde ótetin kontsertimde repetýaryma jańadan enip jatqan ánder mindetti túrde oryndalady», - dedi Dımash Qudaıbergen OKQ-da ótken baspasóz máslıhatynda.
Eske sala ketsek, buǵan deıin OKQ-da ótken baspasóz máslıhatynda Dımash Qudaıbergen Jastar jyly aıasynda Astanada kontsert beretinin aıtqan edi.
«Biz sizdermen úlken mańyzdy jańalyqty bóliskimiz keledi. Biz óz tarapymyzdan talantty jastardy qoldaýǵa daıynbyz. Onyń ústine ózderińiz biletindeı, bıylǵy jyl Jastar jyly dep jarııalanǵan bolatyn. Dımash - elimizdiń, halqymyzdyń birtýar azamaty, qazaqtyń óneri arqyly elimizdiń atyn búkil álemge tanytyp júrgen talantty tulǵa. Bunyń aldynda Dımash Ulttyq arnadaǵy jańa jyldyq shoýǵa qatysqan bolatyn. Al búgingi aıtylyp jatqan joba boıynsha biz Dımashpen birneshe ret kezdesip, aqyldasqan bolatynbyz», - degen edi «Qazaqstan» RTRK AQ basqarma tóraǵasy Erlan Qarın.
