Dımash Qudaıbergen Mańǵystaýdyń týrıstik áleýetin nasıhattaýǵa úles qospaq
AQTAÝ. KAZINFORM – Mańǵystaý oblysynyń ákimi Nurdáýlet Qılybaı óńirge jumys saparymen kelgen tanymal ánshi, halyq artısi Dımash Qudaıbergenmen kezdesip, oblystyń týrızm áleýeti jaıynda áńgimelesti.
Kezdesý barysynda oblys ákimi Memleket basshysynyń tapsyrmasymen týrızm salasynda qolǵa alynyp jatqan jobalar týraly aıtyp, ánshini 2025 jyly Aqtaý qalasynda ótetin Túrki álemine ortaq mereıli is-sharaǵa qatysýǵa shaqyrdy.
– Dımash, qasıetti Mańǵystaý jerinde seni kórgenimizge óte qýanyshtymyz. Seniń bul saparyń – oblysymyzdaǵy týrızmdi damytýǵa zor serpin beredi. Memleket basshysy Qasym-Jomart Kemeluly Toqaev Mańǵystaýdyń týrızm salasyndaǵy áleýetiniń joǵary ekenin aıtyp, damytýdy tapsyrǵan bolatyn. Búginde biz bul salaǵa tyń serpin berý úshin ınfraqurylym máselesin keshendi túrde sheship, týrıster úshin qyzmet sapasyn jaqsartý baǵytynda jumystanyp jatyrmyz. Baký jáne Dýbaı qalalarynyń úlgisimen Aqtaý qalasynyń bas josparyn qaıta qaraý máselesin qolǵa aldyq. Týrısterdi tartý maqsatynda «Jyly jaǵajaı» aýmaǵynda birqatar joba jasalyp jatyr. Buıyrsa Aqtaýdy iri kýrorttyq ortalyqqa aınaldyrý josparymyzda bar, - dedi Nurdaýlet Qılybaı.
Elimizdiń ónerin álemge tanytqan ult maqtanyshy, talantty ánshi Dımash Qudaıbergen qazaq týrızminiń ambassadory retinde Mańǵystaýdyń tarıhı-mádenı jerlerin aralady. Kıeli óńirdiń rýhanııaty, mádenıeti men týrızmin kórsetetin deńgeıi bólek týyndy ázirleýdi josparlaýda. Mańǵystaý oblysyna alǵash ret kelgen ánshi óńirdiń tumsa tabıǵatynan erekshe áser alǵanyn jáne mundaǵy týrıstik nysandardy nasıhattaýǵa úles qosýǵa daıyn ekenin jetkizdi.
– Bozjyraǵa jaqyndaı bergennen bastap keremet áserge bólendik. Ertegi álemine tap bolǵandaı kúı keshtik. Sózben aıtyp jetkizý múmkin emes. Týrızm salasyn damytý baǵytynda alǵan isterińizge sáttilik tileımin. Demalys oryndaryn daıyndaý, ishki, syrtqy týrısterdi tartý – ońaı jumys emes. Biz de el múddesi úshin, mádenıetimizdi damytý baǵytynda jumys istesek odan basqa arman joq. Osy eldiń balasy bolǵandyqtan barynsha qoldaýǵa daıynbyz, - dedi Dımash Qudaıbergen.
