Dımash Qudaıbergen Latyn Amerıkada kontsert berý josparymen bólisti
Qazaqstandyq jas mýzykant fanattarmen tikeleı efır kezinde Brazılııa týraly tilge tıek etken. Dımashtyń ákesi Qanat Aıtbaev ta Latyn Amerıkada kontserttiń aldaǵy ýaqytta ótý múmkindigin jetkizgen.
«Osyǵan deıin Latyn Amerıkada kontsertter berý jóninde usynystar aldyq. Alaıda, koronavırýs pandemııasyna baılanysty keıinge qaldyrýǵa týra keldi. Karantın aıaqtalǵan kezde uıymdastyrýshylar bizge naqty usynystarymen shyǵýy múmkin. Biz árıne, muny eskeretin bolamyz. Latyn Amerıkada kontsertter berý biz úshin qyzyqty», - dedi ánshiniń ákesi.
Brazılııalyq jankúıerler Dımashtyń kelesi týryna Latyn Amerıka enetinine nyq senimdi. Sebebi, mundaǵy fan-klýb kún sanap tanymal bolyp keledi. Tipti, qazaqstandyq oryndaýshynyń álemdegi fan-klýbtary arasynda da tanymal bolyp úlgergen.
Atalmysh eldegi fan-klýb (DKFCB) 24 mamyrda Brazılııa qalasynda ánshiniń týǵan kúnin atap ótý maqsatynda kezdespek bolǵan. Arnaıy baǵdarlama da jasalǵan eken. Múmkindigi shekteýli balalardy mýzykaǵa oqytý úshin qarjy jınaýdy da josparlapty. Alaıda, COVID-19 pandemııasyna baılanysty qaıyrymdylyq aktsııasyn keıinge qaldyrýǵa týra kelgen.
Fan-klýb Shyǵys Eýropadan ákelingen Dımashtyń qoltańbasy bar zattardy satý arqyly 3.100,00 brazılııa realyn (250 myń teńge) jınaǵan. Ol qarajat az qamtylǵan otbasylarǵa bir tonna azyq-túlik jáne tazalyq quraldaryn alýǵa jumsaldy.
«Biz qaıyrymdylyq aktsııasyn Dımashtyń týǵan kúni qarsańynda ótkizgimiz keldi. Óıtkeni, Dımash mahabbattyń, dostyqtyń, tilektestik bildirýdiń jáne yntymaqtastyqtyń belgisi ispetti. Dımash úshin bul baǵaly syılyq bolatynyna senimdimiz», – deıdi brazılııalyq fan-klýbtyń ákimshisi Tatıana Rıbeıro.
«DKFCB» fan-klýby 2018 jyly qurylǵan.
Eske sala ketsek jalpy Dımashtyń jankúıerleri álemniń túkpir-túkpirinde belsendilik tanytyp keledi. Jaqynda ǵana ánshiniń 5 eldegi fanattary «Daıdıdaý» ánin oryndap, vıdeo jarııalaǵan bolatyn.
Sonymen qatar jýyqta Dımash Qudaıbergenniń qazaq tilindegi tuńǵysh albomy jaryqqa shyǵady.
