Dımash Qudaıbergen qytaılyq teleserıaldyń saýndtregin oryndady

ASTANA. QazAqparat - Qazaqstandyq tanymal ánshi Dımash Qudaıbergen qytaılyq teleserıaldyń saýndtregin oryndady, dep habarlaıdy QazAqparat tilshisi.

Qytaılyq Sina Weibo (Týıtterdiń balamasy) áleýmettik jelisindegi aqparattardyń habarlaýynsha, Dımashtyń oryndaýynda «Restart My Love» áni qytaılyq «Mahabbat jáne ıdol» atty jańa teleserıaldyń saýndtregi. 

Aıta keteıik, saýndtregtiń tolyq nusqasy jergilikti ýaqytpen 19 naýryzdan 20 naýryzǵa qaraǵan túni barlyq qytaılyq mýzykalyq platformalaryna shyǵarylyp, az ýaqyttyń ishinde TOP ánderdiń kóshin bastady.

Eske salaıyq, Dımash Qudaıbergen ótken jyly Qytaıdyń «Singer2017» án baıqaýyna qatysyp 2-oryndy jeńip aldy. Sondaı-aq, otandasymyzdyń erekshe daýysy qytaılyq tyńdarmandardyń júregin jaýlap, az ýaqytta sol eldegi eń tanymal ánshige aınaldy.