Dımash Qudaıbergen Qytaıdyń Sınhýa agenttigine suhbat berdi
Qytaıdyń Sınhýa agenttigine Dımash: «Men mýzyka arqyly eki eldiń mádenıetin jaqyndastyryp, halyqtarymyz arasyndaǵy dostyqty nyǵaıtqym keledi», - dep suhbat berdi.
Tanymaldyq
«Onyń boıynan Uly dala minezi, qazaq halqynyń mádenıeti esip turady. Bul árıne, qytaılyq kórermenderdiń qyzyǵýshylyǵyn oıatty», - dedi Qazaqstandaǵy Qytaı elshisi Chjan Hanhýeı Qytaıda ótken «Men ánshimin-2017» kásibı ánshiler baıqaýynyń júldegeri 22 jastaǵy Dımash Qudaıbergenniń ónerine baǵa bere otyryp. Eń jas qatysýshy bola tura, Dımash tek sıangandyq tanymal ánshi Lın Ilıange jol berip, ekinshi oryn aldy.
Baıqaý ótken birneshe aıdyń ishinde Qytaı men Qazaqstanda jáne ózge de memleketterde qazaqstandyq ánshiniń mıllıondaǵan tabynýshylary paıda boldy. Qytaı mýzykalyq qaýymdastyǵy Dımashtyń shyǵarmashylyǵyn erekshe baǵalady, ol «Azııanyń tanymal ánshisi» nomınatsııasy boıynsha bedeldi Top Chinese Music Awards júldesin jeńip aldy.
Qazaqstanda Dımashty el maqtanyshy dep ataıdy. «Ol halqymyzdyń mádenıetin aıdaı álemge tanytty. Bul naǵyz kúsh», - dedi QR Parlamenti Senatynyń tóraǵasy Qasym-Jomart Toqaev.
Biregeı daýys, minez, qytaılyq prodıýserlerdiń kásibıligi, qytaılyq kórermenderdiń ónerdi baǵalaı alýy, damyǵan áleýmettik jeli jáne ózge de kóptegen faktorlar jas oryndaýshynyń tanymal bolýyna septigin tıgizdi dep jazylyp júr.
Sondaı-aq, fanattardy ánshiniń qazaq halqynyń mádenıetine degen erekshe mahabbaty, ony álemge tanytsam degen ynta-yqylasy súısintti. Baıqaý kezeńderiniń birinde Dımash qazaqtyń halyq áni «Daıdıdaýdy» oryndap, nómirdi «Adaı» kúıimen bastady.
«Tyńdarmandar beıtanys án aıtylǵanda tosyrqap qalmady, kerisinshe tez ári ońaı qabyldady. Qalyń jurtshylyq bul ánge qyzyǵýshylyq tanytty», - dedi Dımash. Onyń aıtýynsha, bul ánshige «mýzykada shek joq ekenin taǵy bir ret uǵynýǵa múmkindik berdi».
Ózara qyzyǵýshylyq
«Dımashtyń arqasynda, onyń týyp-ósken eli týraly kóbirek bilgim keledi», - deıdi 19 jastaǵy qytaı qyzy Lý Lý. Talantty, sondaı-aq óte sypaıy ánshi qytaılyqtardyń, ásirese jastardyń Qazaqstanǵa degen qyzyǵýshylyqtaryn oıatty.
Degenmen, mundaı qyzyǵýshylyqty birjaqty dep aıta almas edik.
«Qazaqstandyq oryndaýshyny kórshiles eldiń laıyqty baǵalaýy Qytaıdyń da qazaq qoǵamynda jyly qabyldanýyna yqpal etti», - dep pikir bildirdi halyqaralyq qatynastar boıynsha qazaqstandyq sarapshy Danııar Qosnazarov.
Ol «Jibek jolynyń ekonomıkalyq beldeýi» iske qosylǵan soń, Qazaqstan men Qytaı qarym-qatynastarynyń keńeıe túskenin atap ótti. Eki eldiń joǵary oqý oryndary, saraptamalyq ortalyqtar, jergilikti bılik organdary, mýzeıler jáne shyǵarmashylyq uıymdar deńgeıinde ózara árekettestik paıda boldy. «Mundaı ártaraptandyrylǵan ózara árekettestik kóbeıgen saıyn, memleketaralyq qarym-qatynastar da nyǵaıa túsedi», - dep jazdy ol «Vlast» ınternet-jýrnalyna.
Eske sala ketsek, 2013 jyldyń qyrkúıek aıynda Qazaqstanǵa memlekettik saparmen kelgen QHR tóraǵasy Sı Tszınpın Jibek jolynyń ekonomıkalyq beldeýin qurýdy usyndy. Bir jyldan keıin Qazaqstan Prezıdenti Nursultan Nazarbaev «Nurly jol» jańa ekonomıkalyq saıasatyn usyndy. Eki el «Beldeý men jol» bastamasyn «Nurly jol» baǵdarlamasymen toǵystyrýǵa kirisip ketti.
17 sáýir kúni Beıjińde ótken Qazaqstan men Qytaı arasyndaǵy dıplomatııalyq qarym-qatynastar ornatýdyń 25 jyldyǵyna arnalǵan kontsert «Jarqyn Jibek jolyndaǵy kezdesý» dep ataldy. Onda Dımash Qudaıbergen men ózge de tanymal qazaqstandyq oryndaýshylar Qytaı tele jáne radıotaratýynyń sımfonııalyq orkestrimen birge óner kórsetti.
Qytaımen tanysý
Buǵan deıin «Ánshi» baıqaýyna qatysyp júrgen qazaqstandyq ánshi Chendýge (Qytaıdyń ońtústik-batysyndaǵy Sychýan provıntsııasynyń ákimshilik ortalyǵy) baryp, qytaı mádenıetiniń sulýlyǵy men biregeıligin saqtaýǵa shaqyratyn «Men Qytaıdamyn» jobasynyń resmı ókili atandy. Ánshi pandalarmen «tildesip», Chendýdyń mádenı erekshelikterimen tanys boldy jáne sychýandyq hogodan (qytaılyq samaýryn) dám tatty.
Aıtpaqshy, Dımash aşy taǵamdardy unatatynyn, kóptegen qytaılyq taǵamdardy súısinip jeıtinin aıtty. «Men qytaılyqtardyń dóńgelengen ústelge bir mezgilde birneshe taǵamdy qoıatynyn, bir otyrǵanda birneshe taǵamnyń dámin kórýge bolatynyn bilemin. Bul óte qyzyqty. Ádette bizde birinshi taǵamdy jep bolǵan soń, ekinshisin ákeledi. Qytaıda eshqandaı rettilik saqtalmaıdy, kez kelgen taǵamdy az-azdan jep kórip, toıyp qalamyn», - dep Dımash qytaılyq ashana týraly áserlerimen bólisti.
«Bizdiń elderdiń mádenıetteri ár túrli, árqaısysynyń ózindik erekshelikteri bar. Qytaılyqtarmen etene aralasyp, olardyń qonaqjaılylyǵyn, baıyptylyǵyn, sypaıylyǵy men ózge de tamasha qasıetterin kórgenim úshin ózimdi baqytty sanaımyn», - dedi ol.
Josparlary týraly
Astanadaǵy «EKSPO-2017» halyqaralyq mamandandyrylǵan kórmesi aıasynda Dımashtyń jeke kontserti ótedi. Bul kontsert onyń Qazaqstandaǵy jáne álemniń ózge elderindegi kontserttik týrynyń bastamasy bolmaq.
«Qytaıǵa kontserttik týrmen barýdy asyǵa kútip júrmin. Bul tilegim jaqyn arada oryndalaryna úmittenemin», - dep tolyqtyrdy Dımash.
