Dımash Qudaıbergen kórermenge jańa týyndysyn usyndy
ASTANA. KAZINFORM – Dımash Qudaıbergen Almaty Arena sahnasynda óner kórsetip, Frantsııa, AQSh, Túrkııa jáne Qazaqstan avtorlarynyń ánderin oryndady. Sondaı-aq, ol kompozıtor retinde óziniń «Samǵaý» atty jańa týyndysyn tanystyrdy. Bul týraly dimashnews.com jazdy.
Almaty Open ATP 250 – halyqaralyq deńgeıdegi iri tennıs týrnırleriniń biri ǵana emes, sonymen qatar áıgili ártister qatysatyn erekshe mádenı is-shara.
Osy merekelik keshte Qazaqstannyń halyq ártisi Dımash Qudaıbergen kórermenderge birneshe týyndysyn oryndap, óziniń jańa ánimen erekshe áser qaldyrdy. Ánshiniń qazaq tilindegi halyqqa tartý etken «Samǵaý» atty týyndysy – aspanǵa samǵaǵan qyrannyń óz halqy men jalpy álemge degen sheksiz mahabbatyn beıneleıtin sımvoldyq arnaý.
Án alǵash ret 5 qazanda Madison Square Garden sahnasynda ótken Dımashtyń jeke kontsertinde shyrqalyp, keıin Meksıkadaǵy «Stranger» shoýynda eki ret oryndalǵan bolatyn.
Sonymen qatar Dımash qazaqtyń súıikti avtory Sáken Seıfýllınniń áıgili «Taý ishinde» ánin zamanaýı aranjırovkada oryndap, kórermenderdiń ystyq yqylasyna bólendi. Bul án jaz boıyna qazaqstandyq mýzykalyq reıtıngilerde, sonyń ishinde YouTube-ta da kósh bastap, eldiń súıikti hıtteriniń birine aınalǵan edi. Kúzdiń salqyn keshinde de bul týyndy jyly áser syılap, zaldaǵy kórermenderdi birge qosylyp án shyrqaýǵa jeteledi.
Keshtiń dınamıkasyn arttyrǵan taǵy bir áserli sát – túrik dıdjeıi Býrak Ietermen birlesip jazylǵan «Weekend» áni boldy. Bul kompozıtsııa 2023 jyly Antalııadaǵy jeke kontsert aldynda jazylyp, keıin Dımashtyń «Stranger» týr baǵdarlamasyna engizilgen.
Energııa men romantıkalyq náziktiktiń úılesimin saqtaı otyryp, Dımash taǵy bir tyń premerasy, eki márte «Gremmı» syılyǵynyń ıegeri Ýolter Afanaseftiń jetekshiligimen jazylǵan halyqaralyq jobasyn oryndady. «Love’s Not Over Yet» shyǵarmasy alǵash ret mamyr aıynda Almatydaǵy fan-kezdesýde shyrqalsa, 5 qazanda Nıý-Iorktegi Madison Square Garden sahnasynda Dımash ony Ýolter Afanaseftiń fortepıano súıemeldeýimen oryndaǵan bolatyn.
Aıta keteıik, álemge áıgili ánshi Dımash Qudaıbergen Qazaqstannyń Mehıkodaǵy Elshiliginde bolyp, qazaqstandyq dıaspora ókilderimen kezdesti.