Dımash Qudaıbergen Qytaıdyń «Singer 2024» baıqaýynda óner kórsetedi

ASTANA. KAZINFORM — Qazaqstandyq ánshi Dımash Qudaıbergen qytaılyq Hýnan telearnasynyń «Singer 2024» án baıqaýynyń aqtyq básekesinde óner kórsetedi.

Qytaılyq Weibo áleýmettik jelisinde taraǵan aqparatqa sensek, «Singer 2024» jobasynyń aqtyq básekesi 26 shilde kúni tikeleı efırde kórsetiledi.

Baıqaý shartyna sáıkes, fınalıster birinshi kezeńde arnaıy shaqyrylǵan ánshilermen juptasyp án shyrqaıdy. 

Al ekinshi kezeńge joldama alǵan tórt ánshi jekeleı synda ózara myqtyny anyqtaıdy.

Aıta keterligi, Dımash aqtyq básekeniń alǵashqy kezeńinde qurmetti qonaq retinde sahnaǵa shyǵyp, «Singer 2024» baıqaýynyń qatysýshysy Shante Torreın Mýrmen birge óner kórsetedi.

Buǵan deıin habarlaǵanymyzdaı, qazaqstandyq ánshi Rýhııa Baıdúken Qytaıdaǵy «Singer 2024» baıqaýynyń 8-kezeńinde óner kórsetip, kelesi kezeńge óte almaǵan bolatyn.  

Eske salaıyq, Dımash Qudaıbergen «Singer 2017» baıqaýynda ekinshi oryn ıelengen edi.