Dımash Qudaıbergen Kenshiler kúnine arnalǵan kontserttiń hedlaıneri boldy
QARAǴANDY. KAZINFORM - Qaraǵandy qalasynyń Jańa alańynda Kenshiler kúnine arnalǵan aýqymdy merekelik kontsert ótti. Іs-sharada qala turǵyndary men Qazaqstannyń túrli óńirlerinen jáne shetelderden arnaıy kelgen qonaqtar bas qosty.Bul týraly dimashnews.com jazdy.
Kontserttik baǵdarlamaǵa Qaırat Nurtas pen Dıma Bılan syndy tanymal óner ıeleri qatysty. Merekelik keshtiń qorytyndy bóliminde Qazaqstannyń Halyq ártisi Dımash Qudaıbergen arnaıy baǵdarlamasyn usynyp, kórermenge jýyrda aıaqtalǵan Stranger týryndaǵy kompozıtsııalarmen qatar, zamanaýı mýzykalyq premeralardy da tartý etti.
Dımash óz ónerin Golden kompozıtsııasymen bastady. Baǵdarlamaǵa ánshiniń aǵylshyn jáne qazaq tilderindegi avtorlyq týyndylary – Smoke, Samgau, Give Me Your Love jáne Unforgettable Day shyǵarmalary da endi.
Kontserttik baǵdarlamanyń mańyzdy bóligin kompozıtor Igor Krýtoıdyń Olimpico, Ave Maria, Stranger jáne Lıýbov ýstavshıh lebedeı syndy týyndylary qurady. Ár kompozıtsııa Dımashtyń vokaldyq múmkindikteriniń keń aýqymyn tanytyp, sahnada san alýan emotsıonaldyq atmosfera qalyptastyrýyna múmkindik berdi.
Baǵdarlama barysynda ózge avtorlardyń da týyndylary oryndaldy. Dımash lırıkalyq sıpattaǵy Mahabbat ber maǵan kompozıtsııasyn jáne, dınamıkalyq Weekend ánin oryndady.
Kontserttiń eleýli bóligi qazaqtyń mýzykalyq murasyna arnaldy. Sahnalyq jańa ınterpretatsııada Sáken Seıfýllınniń sózine jazylǵan Tau ishinde, Dýrdaraz Eshnııaz sala shyǵarmalary, sondaı-aq halyq ánderi Aqerke men Adaı oryndaldy. Zamanaýı aranjırovkalar, horeografııalyq qoıylymdar men mýzykalyq súıemeldeý dástúrli saryndardy qazirgi sahnalyq estetıkamen sabaqtastyra tústi.
Kontserttik baǵdarlamada Dımashpen birge kásibı mýzykant-aspapshylar da óner kórsetti. Ulttyq mýzykalyq aspaptarda qobyzshy Oljas Qurmanbek, dombyrashylar Temirlan Oljabaı men Ernat Naýryz óner kórsetti. Mýzykanttar Dımashtyń kontserttik nómirlerine qatysyp qana qoımaı, jeke shyǵarmalaryn da usyndy.
Keshtiń erekshe sátteriniń biri – Dımashqa dástúrli órnekpen kestelengen shapannyń tartý etilýi boldy. Syılyqty ánshi sahnaǵa arnaıy shaqyrǵan jas qazaqstandyq dızaıner tabystady. Dımash dızaınerge eńbegi úshin erekshe alǵysyn bildirdi.
Keshtiń qorytyndy kompozıtsııasyn ánshi kórermender arasynda oryndady. Sahnadan túsip, kópshilikke jaqyn jerde án shyrqaýy kontserttiń áserli fınalyna aınalyp, kórermendermen aradaǵy erekshe shyǵarmashylyq baılanysty aıqyndaı tústi.
Aıta keteıik, Dımashtyń «Yazgi» áni Belgııa radıolarynda shyrqaldy.
