Dımash Qudaıbergen QazUÓÝ-diń 20 jyldyǵy kontsertterine qatysady
ASTANA. QazAqparat - Aldaǵy jyly Qazaq ulttyq óner ýnıversıtetiniń 20 jyldyǵyna oraı ótetin kontsertterde qazaqstandyq ánshi Dımash Qudaıbergen óner kórsetedi.
Bul týraly «QazAqparat» HAA tilshisine oqý ornynyń rektory Aıman Musaqojaeva málim etti.
«Ýnıversıtettiń 20 jyldyǵyna oraı esepti kontsertter Qazaqstan aýmaǵynan bólek, barsha álemde ótedi. Osy oraıda esepti kontsertterdi Eýropa, Azııa elderinde jáne AQSh-ta beremiz. Oqý ornynyń 20 jyldyǵyna bizdiń barlyq óner juldyzdarymyz, onyń ishinde JOO túlekteri men «Astana opera» teatrynda, álem elderindegi orkestrlerde qyzmet etip júrgender keletin bolady. Árıne, Dımash ta óner kórsetedi, ol áli úshinshi kýrstyń stýdenti», - dedi A. Musaqojaeva.
Eske sala keteıik, Dımash Qudaıbergen osy jyldyń basynda Qytaıdyń «Singer 2017» án baıqaýyna qatysyp, ekinshi oryn jeńip aldy. Otandasymyzdyń talantty óneri kóptegen qytaılyq jáne basqa elderdiń jankúıerlerin tánti etti. Sonymen qatar Dımash Qytaıdaǵy kóptegen mýzykalyq marapattaýlardy enshiledi.
Aıta ketken jón, Qazaqstan Respýblıkasy Úkimetiniń 1998 jylǵy 31 naýryzdaǵy №269 qaýlysymen Qazaq ulttyq mýzyka akademııasy ashyldy. Qazaqstan Respýblıkasy Bilim jáne ǵylym mınıstriniń 1998 jylǵy 15 sáýirdegi №28 buıryǵymen Qazaq ulttyq mýzyka akademııasynyń rektory bolyp Qazaqstan Respýblıkasynyń Halyq ártisi, professor Aıman Musaqojaeva taǵaıyndaldy. QR Úkimetiniń qaýlysymen 2009 jyly elordada ónerdiń barlyq túrin damytý maqsatynda Qazaq ulttyq mýzyka akademııasy Qazaq ulttyq óner ýnıversıteti bolyp qaıta quryldy.
