Dımash Qudaıbergen: Kásibı mansapty uzaq merzimge josparlaý kerek
ASTANA. KAZINFORM – Álemdik deńgeıge shyǵýdy kózdegen óner adamy qysqa merzimdi paıdaǵa emes, uzaq merzimdi maqsatyna mán berýi kerek. Bul týraly álemdik ánshi Dımash Qudaıbergen Astana Finance Days aıasyndaǵy paneldik sessııada aıtty.
Ol suhbat barysynda qazaqstandyq ónerpazdardyń álemdik sahnaǵa shyǵýy úshin ne mańyzdy ekenine toqtaldy.
Dımash Qudaıbergenniń aıtýynsha, eń aldymen óner adamy óz jolyn tańdap, soǵan senýi kerek. Qarjylyq jaǵynan tıimdi kóringen ár múmkindik úshin baǵytyn ózgerte berý uzaq merzimdi maqsatqa kedergi keltirýi múmkin.
– Óz jolyńmen júrý kerek. Ózińe sený de óte mańyzdy. Qysqa ýaqytta qarjylyq paıda ákeletin múmkindik paıda boldy eken dep baǵytyńdy ózgerte bermeý kerek, – dedi ol.
Ánshi kásibı mansapty basqarýda uzaq merzimdi jospardyń mańyzyna toqtalyp ótti.
– Kásibı mansapty basqarý degenimiz – uzaq merzimdi oılaý. Búgin tıimdi bolyp kóringeni úshin ár usynysty qabyldaı berýge bolmaıdy. Qandaı maqsatqa qaraı kele jatqanyńdy árdaıym este ustaý kerek, – dedi Dımash Qudaıbergen.
Onyń pikirinshe, halyqaralyq deńgeıge shyǵý úshin talantpen qatar ózine sený, naqty maqsat jáne sol baǵyttan aınymaý mańyzdy.
Aıta keteıik, Dımashtyń «AQERKE» áni halyqaralyq jazǵy hıt-paradtyń úzdik úshtigine endi.
