Dımash Qudaıbergen Kann kınofestıvali aıasyndaǵy qazaq keshinde án shyrqaıdy

ASTANA. QazAqparat - Kann halyqaralyq kıno festıvali aıasynda 8-19 mamyr kúnderi Qazaqstannyń Ulttyq pavılony otandyq kınoındýstrııa ónimderin usynady. «Rýhanı jańǵyrý» baǵdarlamasy aıasynda ánshi Dımash Qudaıbergen qatysyp, án shyrqaıdy, dep habarlaıdy QazAqparat tilshisi QR Mádenıet jáne sport mınıstrliginiń baspasóz qyzmetine silteme jasap.

«Ulttyq pavılonda «Evrazııa» halyqaralyq kınofestıvaline tanystyrylym ótedi. Eýrazııalyq naryq jobalary usynylyp, ádilqazylar, baǵdarlama tanystyralady, kınonaryq, qazaqstandyq fılmderdi dıstrıbıýterlik kompanııalarymen kezdesý uıymdastyrylady. QR kınomatografısteriniń delegatsııasy baspasóz máslıhatyn ótkizedi», - dep habarlady QR Mádenıet jáne sport mınıstrliginiń baspasóz qyzmeti.

Bıyl Kann kınofestıvaliniń «Erekshe kózqaras» baǵdarlamasyna rejısser Ádilhan Erjanovtyń «Laskovoe bezrazlıchıe mıra» kınokartınasy, Sınefondason baǵdarlamasynda Jannat Alshanovanyń «Maýsym sońy» fılmi qatysady. ACID baǵdarlamasy boıynsha rejısser Olga Korotkonyń «Jaıly qys», «Short Film Corner» baǵdarlamasy boıynsha Venera Kaırjanovanyń «Jasyrynbaq», Berik Jahanovtyń «Asam» qysqametrajdy kınokartınasy kórsetiledi.
Bıyl ekinshi ret qazaqstandyq pavılonnyń ashylýy ótedi. Mınıstrliktiń málimetine súıensek, jas, talantty qazaqstandyq rejısserler ózderiniń eń úzdik týyndylaryn kınofestıvalge aparady. Delegatsııa quramynda memlekettik organ ókilderi, shyǵarmashylyq ıntellıgentsııa, Qazaqstannyń kıno men TV ókilderi, Qazaq ulttyq óner akademııasynyń stýdentteri bar. Al 2018 jyldyń 9 mamyry kúni Hôtel Barrière Le Majestic Cannes ǵımaratynda «Kanndaǵy qazaq keshi» atty resmı qabyldaý ótedi. Sharaǵa QR halyq ártisi Aıman Musaqojaeva, ataqty ánshi Dımash Qudaıbergen, «Solıster akademııasy» memlekettik orkestri jáne ózgeleri qatysady. Qazaqstan ulttyq pavılony QR Mádenıet jáne sport mınıstrligi men Frantsııadaǵy Qazaqstan elshiliginiń qoldaýymen ashyldy.