Dımash Qudaıbergen Kann festıvalinde án shyrqaıdy
ALMATY. QazAqparat - Kann kınofestıvalinde alǵash ret qazaqstandyq pavılon ashylmaq, dep habarlaıdy QazAqparat tilshisi.
Qazaqstan pavılonynyń resmı operatory - «Ulttyq kınematografııa óneri men ǵylymdarynyń akademııasy» Qoǵamdyq birlestigi (QB). Atalǵan QB 70-shi Kann halyqaralyq kınofestıvalinde elimizdiń kınoındýstrııasyn tanystyrmaq. Birinshi Qazaqstandyq pavılon «Le Village International» kınonaryǵy aýmaǵynda Festıvalder saraıy mańynba bolady.
19 mamyr kúni Frantsııanyń Ulttyq kınematografııa ortalyǵynyń alańynda Qazaqstan pavılonynyń ashylýyna oraı resmı qabyldaý sharasy ótpek. Baǵdarlamada kameralyq ishekti ansambldiń súıemeldeýimen Aıman Musaqojaeva men Dımash Qudaıbergen óner kórsetedi.
Oǵan Kann kınofestıvali men kınonaryǵynyń qonaqtary men qyzmetshileri, Frantsııadaǵy QR elshiliginiń ókilderi, Kókshil jaǵalaýdaǵy mýnıtsıpaldy bılikter men kınokomıssııalardyń ókilderi shaqyrylǵan.
«Qazaqstan Ulttyq pavılony - Kann kınonaryǵynda qazaqstandyq kınematografısterdiń jumys isteýine arnalǵan alań. Operator retindegi kınoakademııanyń mindeti, elimizdiń kınoındýstrııasynyń qatysýshylaryna, onyń ishinde: kınoóndirýshilerge, prokat jasaýshylarǵa, rental stýdııalarǵa, kınojelilerge pavılondy paıdalanýǵa múmkindik týǵyzý», - dedi kınoakademııa prezıdenti Rashıd Nuǵmanov.
Eń aldymen, pavılon aýmaǵynda kásibı kezdesýler ótkizilip, fılmder men jobalardy ilgeriletý men qyzmetter jóninde kelissózder júrgizýge jol ashylmaq.
«Halyqaralyq festıvalderge qatysý Qazaqstannyń kıno túsiretin el retindegi ımıdjin kúsheıtip, birlesken jobalarǵa seriktes izdeýge kómektesedi, el ekonomıkasyna aqsha túsýin qamtamasyz etý úshin respýblıka aýmaǵynda sheteldik jobalardy iske asyrýdyń keleshegin qalyptastyrady», - delingen QB habarlamasynda.
