Dımash Qudaıbergen Ystanbulda VIII Etnosport mádenıet festıvaline qatysady
ASTANA. KAZINFORM - 23 mamyr Dımash Qudaıbergen Ystanbul qalasynda ótetin VIII Etnosport mádenıeti festıvali aıasynda óner kórsetedi, dep jazdy dimashnews.com.
Atalǵan is-shara Dúnıejúzilik etnosport konfederatsııasynyń uıymdastyrýymen 21–24 mamyr aralyǵynda Atatúrik atyndaǵy áýejaı aýmaǵynda ótedi.
Festıval baǵdarlamasy dástúrli sport túrleri men ulttyq oıyndardy, qolóner kórmelerin, gastronomııalyq aımaqtardy, teatrlandyrylǵan qoıylymdar men shyǵarmashylyq keshterdi qamtıdy.
2025 jyly festıvalge bir mıllıon adam qatysqan bolsa, uıymdastyrýshylar bıyl kelýshiler sanyn 1,5 mıllıonǵa jetkizýdi maqsat etip otyr.
Qazaqstannyń halyq ártisi Dımash Qudaıbergen 23 mamyrda Türk Telekom basty sahnasynda kontserttik baǵdarlamasymen óner kórsetedi. Kontserttiń bastalý ýaqyty — jergilikti ýaqyt boıynsha saǵat 20:00.
Festıval aıasyndaǵy barlyq is-shara kópshilik úshin tegin.
Aıta keteıik, Dımash Qudaıbergenniń áni Polsha chartynda bir jyl boıy kósh bastap tur.
