Dımash Qudaıbergen halqyna «Arnaýyn» tanystyrdy

NUR-SULTAN. QazAqparat - Ánshi Dımash Qudaıbergen Instagram paraqshasynda elordada ótetin «Arnaý» atty kontsertin tanystyratyn shaǵyn vıdeo jarııalady, dep habarlaıdy QazAqparat tilshisi.

«Dımash Qudaıbergen! Qazaqstannyń birtýma daryn ıesi. Álem boıynsha mıllıondaǵan tyńdarmannyń júregin jaýlaǵan Dımash «Arnaý» atty jańa shoý usynady. Onyń daýysy - ımpýls. Shabyttandyrady, qýattandyrady. Kórermendi aıryqsha daýys dıapazonymen, aýqymdy shoý kútedi», - delingen vıdeojarnamada.

Eske sala ketse, «Arnaý» atty kontsertiniń qashan ótetinin ánshi osy jyldyń basynda jarııalaǵan bolatyn. Kontsertti birneshe sheteldik telearna kórsetetin bolady.

«Sheteldik telearnalar men teleradıokorporatsııalar ártúrli suraýlar joldap jatyr. Astanada ótetin osynaý kontsert birneshe sheteldik telearna arqyly taralady. Sol sebepti, aýdıtorııa úlken. Uıymdastyrý jumysyn keń aýqymda júrgizgeli otyrmyz. Óz elinde, óz alańynda, myńdaǵan fanattarynyń aldynda ótetin Dımashtyń kontsertine oraı qoldaýlaryńyzdy suraımyz», - degen edi elordada ótken baspasóz máslıhatynda Erlan Qarın.