Dımash Qudaıbergen: Halyq murasyn nasıhattaý — shyǵarmashylyǵymdaǵy mańyzdy baǵyt
ALMATY. KAZINFORM — Dımash Qudaıbergen Almatyda ótip jatqan fan-kezdesýinde jankúıerleriniń suraqtaryna jaýap berdi.
Kezdesý barysynda Dımash jaqynda jaryqqa shyqqan «Taý ishinde» beınebaıany týraly aıtty.
— «Taý ishinde» adamnyń tabıǵatpen úndestigin, jan tereńdigin, saǵynyshty jetkizetin uly týyndy. Bul ánniń avtory — qazaq aqyny ári jazýshysy Sáken Seıfýllın. XX ǵasyrdyń basyndaǵy qazaq ádebıeti men mádenıetiniń, rýhanııatynyń negizin qalaýshylardyń biri. Osy án arqyly men sol bir sezimniń sulýlyǵyn, tazalyǵyn búgingi tyńdarmanǵa, artymyzdan ósip kele jatqan óskeleń urpaqqa zamanaýı baǵytta jetkizgim keldi. Osy beınebaıanǵa ózgeshe baǵyt tańdadyq, jeńil komedııa bolsyn dedik. Halyqtyń murasyn qazirgi aýdıtorııaǵa jaqyndatý — meniń shyǵarmashylyǵymdaǵy mańyzdy baǵyttardyń biri, — dedi ol.
Sondaı-aq ónerpaz aýstralııalyq jankúıeriniń: «Ózińizdi akter ne rejısser retinde kóresiz be?» - degen suraǵyna jaýap berdi.
— Aıtarym, men ánshimin. Múmkin bolashaqta akterlikti qarastyryp kóremin. Biraq qazir meniń bar nazarym án men mýzykada, — dedi Dımash Qudaıbergen.
Halyq súıiktisi taǵy bir suraqqa jaýap bere otyryp, ómirlik ustanymdary týraly aıtyp ótti.
— Ata-anama qaryzdar bolyp ótý, Otanǵa degen súıispenshilik, tilge degen qurmet, halyqqa degen qurmet. Meni árbir baıqaýlarda, kontsertterde azdy-kópti jeńisterge jetip júrgen kezde ákem (atasy - red.) kúnde bir-aq nárseni qaıtalap: «Seniń keýdeńe nan pispegeni unaıdy» - dep otyratyn. Sondyqtan árbir aıtylǵan sózderi jadymda qaldy. Elimiz aman bolsyn, jurtymyz tynysh bolsyn, — dedi Dımash Qudaıbergen.
Búgin Dımash Qytaı telearnasy kórsetetin ánshiler baıqaýynyń prodıýseri bolatynyn habarlady.
Buǵan deıin Dımashtyń búgingi fan-kezdesýine 40-tan astam elden jankúıerler kelgenin jazǵanbyz.
Osy aıda Dımash Qudaıbergen belgili qazaq aqyny ári jazýshysy, qazaq ádebıetiniń negizin salýshylardyń biri Sáken Seıfýllınniń ánine túsirilgen jańa beınebaıannyń tusaýyn kesti.