Dımash Qudaıbergen «Grammy Global Spin» halyqaralyq jobasyna qatysty
ASTANA. KAZINFORM — 4 jeltoqsanda amerıkalyq mýzyka marapattardyń biri «Grammy» syılyǵynyń resmı saıtyn men YouTube arnasynda Dımash Qudaıbergenniń óz avtorlyq «Fire» kompozıtsııasymen oryndaǵan jańa beınejazbasynyń premerasy ótti.
Qazan aıynda ol Nıý-Iork qalasyndaǵy álemge áıgili Madison Square Garden sahnasynda qazaq mádenıetin joǵary deńgeıde tanystyryp, zor tabysqa jetkeninen keıin, Dımash Amerıka Qurama Shtattaryndaǵy eń bedeldi mýzykalyq ınstıtýttardyń biri Grammy.com platformasymen jáne Amerıkandyq Ulttyq dybys jazý óneri men ǵylymy akademııasymen shyǵarmashylyq baılanys ornatty.
«Global Spin» jobasy 2021 jyldyń qyrkúıeginde álemdik mýzykalyq qaýymdastyqty qoldaý jáne damytý maqsatynda iske qosylǵan. Joba aıasynda búginge deıin K-pop janrynyń megajuldyzdarynan bastap, nıgerııalyq hıp-hop jáne shotland folk oryndaýshylaryna deıin kóptegen tanymal halyqaralyq ártister óner kórsetti. Árbir shyǵarylym belgili bir oryndaýshynyń ǵana emes, sondaı-aq onyń Otanyn da dáripteıtin eksklıýzıvti tikeleı oryndaýdan turady.
Dybys jazý akademııasy AQSh-tyń oryndaýshylarynyń, án avtorlarynyń, prodıýserleriniń, dybys rejısserleriniń jáne basqa da mýzykalyq mamandarynyń múddelerin qorǵaı otyryp, sondaı-aq álemdegi eń bedeldi mýzykalyq marapat — «Grammy» syılyǵyn da uıymdastyrady.
Mundaı joǵary bedeldi uıym tarapynan moıyndalý álemdik mádenı keńistikte óz elin tanystyryp júrgen ártis úshin mańyzdy qadam.
Aıta ketelik Berlınde Dımash Qudaıbergenge arnalǵan sýret kórmesi ótkeni týraly jazǵan edik.