Dımash Qudaıbergen Dinder sezi delegattarynyń aldynda óner kórsetti
Álemdik jáne dástúrli dinder lıderleri VII seziniń resmı ókili Nazym Janǵazınovanyń aıtýynsha, bir sahnada esimi álemge áıgili óner maıtalmandary jınaldy.
Olardyń arasynda Dımash Qudaıbergen, Qazaqstannyń eńbek sińirgen qaıratkerleri Azamat Jaltyrgózov, Bıbigúl Januzaq, Nurbolat Arzamas, Jámılá Jarqymbaeva, halyqaralyq baıqaýlardyń laýreaty Jaqsykeldi Maıasarov, P.I.Chaıkovskıı halyqaralyq baıqaýynyń laýreaty Aqbıke Alǵı bar. Sondaı-aq sharaǵa «Astana Opera» teatrynyń hory, balet trýppasy men sımfonııalyq orkestri, dombyrashylar ansambli, Memlekettik respýblıkalyq akademııalyq koreı teatrynyń bı toby, «Astana Opera» balalar hory, «Astana balet» teatry, «Astana sazy» ansambli jáne basqa da birqatar bı ujymdary qatysty.
Dımash Qudaıbergen kórermenge jańa sınglin usyndy. Buǵan deıin habarlaǵanymyzdaı, «The story of one sky» («Bir aspannyń hıkaıasy») áni adamdardy tatýlyqqa úndeıdi. Ánshi násilge, ultqa, dinge bólingen halyqtyń bári bir planetanyń perzenti jáne bir aspan astynda ómir súrip jatqanyn aıtady.
«Dımash bul shyǵarmany jazýdy 3 jyl buryn bastaǵan bolatyn. Ulym kompozıtsııaǵa barynsha jaýapkershilikpen qarady, bar yntasyn saldy. Jańa týyndynyń mýzykasynyń avtory da ózi. Alǵashynda izgilik pen tatýlyqty tyńdarman boıyna sińiretin jyr jazý, halyq birligin kórsetý kerek degen oı ǵana boldy», – dep atap ótti mýzykanttyń ákesi Qanat Aıtbaev jańa án týraly.
Álemdik jáne dástúrli dinder lıderleriniń VII sezi osy ýaqytta elordadaǵy Táýelsizdik saraıynda ótip jatyr.
