Dımash Qudaıbergen Ankarada túrki áleminiń óner juldyzdarymen bir sahnada óner kórsetti
ASTANA.KAZINFORM — 28 qazanda Ankarada Túrkııa Respýblıkasynyń qurylǵanyna 103 jyl tolýyna oraı Túrki memleketteri uıymy uıymdastyrǵan mádenı is-sharalar aıasynda «Grand Arena Concert» atty kontsert ótti. Aýqymdy mýzykalyq keshte Túrkııa Prezıdenttik sımfonııalyq orkestri men túrki áleminiń tańdaýly klassıkalyq vokal oryndaýshylary bas qosty. Bul týraly dimashnews jazdy.
Qazaqstan men Qyrǵyzstannyń halyq ártisi, TÚRKSOI uıymynyń joǵary marapaty — «Túrki áleminiń mádenıet elshisi» ordeniniń ıegeri Dımash Qudaıbergen kontsertke arnaıy shaqyrylǵan qurmetti qonaq retinde qatysty.
Dırıjer Djemı Djan Delıormannyń jetekshiligimen Túrkııa Prezıdenttik sımfonııalyq orkestri álemdik klassıkalyq mýzyka murasynyń tanymal týyndylaryn oryndady. «Ankara Arena» sahnasynda Nıno Rotanyń «Parla più piano», Djýzeppe Verdıdiń «Travıata» operasynan «Brindisi», Latıf Hamıdıdiń «Bulbul» shyǵarmalary jáne basqa da áıgili mýzykalyq týyndylar shyrqaldy.
Kontsertte soprano Zarına Altynbaeva men Saltanat Dáýlethanova (Qazaqstan), tenor Murat Karahan men soprano Berıl Ióreklı El (Túrkııa), tenor Atadjan Berdıev (Túrikmenstan), soprano Zaıra Raımbekova (Qyrǵyzstan), tenor Ýmıd Shavkat Ýglı (Ózbekstan) jáne tenor Ramıl Gasymov (Ázerbaıjan) óner kórsetti.
Dımash Qudaıbergen Túrkııa Prezıdenttik sımfonııalyq orkestriniń súıemeldeýimen óziniń «Umytylmas kún» atty avtorlyq kompozıtsııasyn qazaq tilinde oryndap, álemdik rok mýzykasynyń klassıkasy sanalatyn Queen tobynyń «The Show Must Go On» týyndysyn kópshilik nazaryna usyndy.
Sonymen qatar qazaqstandyq ánshi tanymal túrik dıdjeıi Býrak Ietermen birlesip jazǵan «Weekend» kompozıtsııasyn jáne jýyrda tusaýy kesilgen, túrik tilindegi alǵashqy avtorlyq áni «Yazgı» týyndysyn oryndady.
Dımashtyń sahnadaǵy ónerin keshke jınalǵan kórermender ystyq yqylaspen qarsy alyp, úzdiksiz qoldaý kórsetti. Ánshi kórermendermen qazaq, aǵylshyn jáne túrik tilderinde amandasyp, alǵysyn bildire otyryp, baýyrlas túrik halqynyń aldynda óner kórsetýdi zor qýanysh ári mártebe sanaıtynyn atap ótti.
Aıta keteıik, buǵan deıin Dımashtyń kontsertteri qarsańynda Mehıkoda arnaıy avtobýs qatynaı bastaǵanyn jazdyq.
