Dımash Qudaıbergen Almatyda Ýnıversıadanyń ashylýynda óner kórsetedi
ASTANA. QazAqparat - Qytaıdyń Chańsha qalasynda ótip jatqan «I am a Singer-2017» án baıqaýynyń birinshi jáne ekinshi kezeńderinde jeńiske jetken jerlesimiz Dımash Qudaıbergen Almatyǵa keldi, dep habarlaıdy QazAqparat.
Ol búgin Almatydaǵy Ýnıversıadanyń ashylý saltanatyna qatysyp, tikeleı efırde óner kórsetetin bolady. «Ýnıversıadaǵa qatysatyn barlyq qatysýshylarǵa sáttilik, Qazaqstanǵa jeńis tileımin! Men sizdermen birgemin!» - dep jazdy Dımash óziniń Instagram paraqshasyna.
Eske sala ketsek, Dımash Qudaıbergenov qazaqstandyq estrada ánshileri Qanat jáne Sveta Aıtbaevtardyń uly. Ol Qytaıdyń Hunan TV basty oıyn-saýyq telearnasyndaǵy «I am a Singer-2017» mýzykalyq shoýynda baq synap jatyr. Birinshi kezeńde Dımash eń qıyn ánderdiń biri «SOS d'un terrien en détresse» kompozıtsııasyn jáne kúni keshe reseılik Vıtastyń «Opera №2» ánin oryndap, qos saıysta da jeńiske jetti.
