Dımash Qudaıbergen Almatyda ózi beınelengen mýralǵa qatysty oıyn bildirdi
Ánshi óziniń Instagram – daǵy paraqshasynda jerlesteriniń «syılyǵy» ózine qatty unaǵanyn, olarǵa ishteı rahmet aıtqanyn jazdy.
«Almaty qalasynda Qabanbaı batyr men Sáken Seıfýllın kósheleri qıylysynda osyndaı keremet mýral salynypty. Jerlesterdiń «syılyǵyn» kórgende ishteı alǵysymdy bildirdim. Alaıda, Dımash Qonaevtaı uly tulǵalarymyz turǵanda jas býyn ókili óziniń alyp sýreti jaıly jar salǵany uıat bolar dedim de, úndemedim. Qazirgi tańda, osynsha qıyn jumysqa eńbegi ketken azamattarǵa alǵys aıtýdy jón kórip otyrmyn. Qadirli sýretshiler, qoldaryńyz dert kórmesin, týyndylaryńyz jer sharyn sharlap, qazaqtyń atyn bıikke kótersin. Jáne barsha qoldaýshylaryma shyn júrekten alǵys bildiremin.Úlken rahmet!»,– dep jazdy Dımash Qudaıbergen.
Aıta keteıik, Dımash Qudaıbergen beınelengen alyp kartına Qabanbaı batyr men Seıfýllın kósheleriniń qılysynda ornalasqan úılerdiń biriniń qabyrǵasyna maýsym aıynda paıda boldy.
